Heri postmeridie, me promenante preter nostre plagia atlantic, requardante
al nordest super le ondas blau del mar, pensante a plure de vos vivente in
Europa, io era occupate con pensatas super le phenomeno de "interlinguas".
Retornate al domo io inviava duo messages a INTERLNG. Le un con pensatas
super "iridescentia".  Le altere con pensatas super  possibilitates haber
altere "interlinguas" pro servir altere familias linguistic como, p.e., un
InterGermanic pro le linguas germanic o un InterSlav pro le linguas slavic,
etc.   E, reflectente super iste cosas, io realisava que nostre proprie
"interlingua", non ha su proprie nomine.  In veritate nos scribe lo semper
con le littera "i" sin majuscule.  Alora--como occurre assatis sovente con
me--quando io me addormi con le mente plen de pensatas e questiones, io
evelia con le mente plen de ideas, suggestiones, e phantasias.  Hodie io
eveliava con tres "nomines" volante in mi imagination.   Le prime duo
nomines--InterRomance e Iridial--exprime le un le origine, le altere un
characteristica de nostre "interlingua".  Mais le tertie nomine me placeva
le plus proque illo exprimerea le futuro possibile--Europese Commun.

-- frank