Como coordinator del collection del historia de interlingua
(www.interlingua.dk/2001.htm), io pote solmente exprimer mi sincer
gratias, si Jay Bowks e Stan Mulaik pote realisar le bon ideas
presentate in iste lista. Il non solmente esserea interessante, il
esserea MULTO interessante, haber e le archivos del New York Public
Library super interlingua e le material historic valorosissime in
possession private de Stan Mulaik accessibile sur Internet. (De facto,
io pensa que on anque debe publicar lo in un libro, ben redigite, ma
isto pote occurrer plus tarde.)

On ha vidite troppo sovente in iste lista que personas CREDE haber
legite qualcosa o ASSUME que isto o illo esseva le intention con
interlingua. Il sembla que hodie on non es interessate plus in recercar
le factos. Le resultato es un fluxo de rumores e "von-hören-sagen" (como
le germanophonos dice), i.e. messages sin fundamento, sin substantia.

Haber le archivos del NYPL e de Stan Mulaik in Internet, permittera
recercatores e omnes con interesse seriose pro interlingua de studiar
privatemente le material.

E io absolutemente es de accordo con Rodrigo (2001-10-17) que le
material debe esser trovate a www.interlingua.com in un subsection
historic. Ma usque a iste tempore, io propone que nos lo publica con le
altere materiales historic a www.interlingua.dk. Dunque io invita Jay
Bowks e Stan Mulaik a contactar me, assi que nos pote coordinar nostre
effortios. Nam io absolutemente es interessate collaborar activemente.

Con mi optime salutes
Thomas Breinstrup