Car lectores e ascoltatores,

Io vole recommendar vos le 8ve (octave) podcast de Radio Interlingua, de martio 2009 (duo milles novem).

Post le emission no. 6 (sex), plen de humor a causa del anno nove, anque in lo no. 8 (octo) se trova un poc de humor; il se tracta del historia de un adresse e-postal misscribite. Certo anque vos cadeva a in un tal situation (como io, p. ex.), que vos recipeva un message false a vostre cassas e-postal, que non del toto era intendite pro vos, essente forsan mesmo troppo intime. Un tal historia es detaliate tragicomicamente in iste narration burlesc.

Post isto vos potera ascoltar le prime parte del interview con Alberto Mardegan, que io ha facite con ille in le estate de 2005 in Asa, Svedia, in le conferentia international de interlingua. In iste parte nos parla super cosas non essente in connexion con interlingua: su habitation e labor in Finlandia, su impressiones super le pais, super le finneses, su apprension del lingua finnese, su hobby, le photographamento (digital vs. analoge).

Le archivo de interlingua pote causar ancora suprisas, como le registrationes de Thomas Breinstrup con Ferenc Jeszenszky (representante hungare de interlingua), del conferentia de Taastrup, Danmark de 1985 (mille novem centos octanta cinque), presentate in previe emissiones de Radio Interlingua causava un ver surprisa pro Ferenc, proque ille non memorava iste registrationes. Assi equalmente le registration de Thomas del mesme loco e occasion con Frank Esterhill (SUA), presentate in iste emission octave pote causar surprisas pro multes, io es certe. Io me demanda, si ille es informate super iste cosa; super lo, que su narration de alora ora es presentate in Radio Interlingua! Ille narra le novella "Amata" de Alexander Gode, legite del libro "Dece Contos" - publicate per le Servicio de Libros de UMI, que contine obras belletristic de Alexander Gode.

Le ligamine pro ascoltar, respectivemente discargar le 8ve emission de Radio Interlingua es:

http://www.interlingua.com/node/605 .

Al mesme spatio vos pote scriber vostre commentarios al emission.

Le redaction de Radio Interlingua spera, que vos va diverter vos ben, ascoltante iste emission!

Péter Kovács
redactor

--
Archivos e disabonar: http://listserv.icors.org/archives/INTERLNG.html