UN STRATEGIA GARANTIENTE LE SECURITATE NUCLEARI IN LE PAISES DE EUROPA
CENTRAL E ORIENTAL.
Le Commission europee debe cercar a concluder, in le structura del
Convention international super le securitate nucleari, un accordo super
le normas del securitate nucleari e le regulas de construction e de
operation de centeres de energia nucleari, le cyclo de combustibiles
nucleari e le conditiones de transporto, con le paises candidatos de
Europa central e oriental (PECO) e con le nove statos independentes
(NSI). De plus illo debe concluder un accordo super un strategia de
energia pro cata un del PECO e NSI in le structura del accordos de
cooperation e del partenariato con iste paises. Le negotiationes de
accession con le PECO debe assecurar que le securitate nucleari es
garantite. Le alargamento del UE debe in necun maniera compromitter
le securitate nucleari, que es un prioritate de "Agenda 2000", viste
que le conformitate a su requirimentos es parte del _acquis communautaire_.
On appella al Commission europee a presentar, tanto tosto como possibile,
alcun propositiones concrete pro meliorar le coordination inter le
differente servicios responsabile pro le intervention del Union
Europee in le sector nucleari del PECO e le NSI, in particular in
regardo al ligamine inter le actiones a interprender in le dominio de
recerca (5te programma structural de RTD) e de relationes exterior
(programmas PHARE e TACIS).
Istos es le demandas principal formulate per le Committee super le Recerca
del Disveloppamento Technologic e del Energia (Presidente: Umberto
SCAPAGNINI (PPE, I)), que ha approbate le reporto redigite per Gordon
ADAM (PSE, RU) in connection con le communication del Commission super
le activitates ligate al sector nucleari pro le PECO e NSI. Le debatto in
plenari durante le session in martio in Strasbourg va occurrer contra le
fundo del Reporto Special Nro 25/98 del Corte de Auditores. Le plenari
esseva stupefacite a apprender del bucca del Presidente del Corte de
Auditores Sr. Friedmann le novembre passate que solmente .300 m ha essite
expendite usque ora pro appoio pro le securitate nucleari in le Europa
Central e Oriental, benque le UE habeva assignate alcun .850 m pro aquelle
fin inter 1990 e 1997. Le Corte de Auditores de plus sublineava que al
fin de 1997, il non esseva possibile a judicar si o non il habeva alcun
progresso real in respecto del securitate nucleari.
Le Committee de Recerca desira que le Commission europee presenta un
reporto complete respondente totalmente al criticas e questiones continite
in le Reporto Special del Corte. Le Commission es equalmente invitate a
preparar pro le Parlamento un reporto bi-annual super le travalio currente
per medio de programmas del Communitate, del adjuta de statos membros,
de contribution del industria UE, e del Conto de Securitate Nucleari gerite
per le BERD. Si defectos o abusos in le execution de programmas es
constatate, illos debe esser le objecto de inquestas implacabile, notificate
al PE, e mesuras prendite como il es appropriate.
Le committee reguarda con felicitate le constitution del Association
de Regulatores Nucleari de Europa Occidental e su contribution al definition
de standards del securitate nucleari pro le UE. Illo equalmente es felice
al creation de authoritates independente a assecurar conformitate con iste
standards in le paises candidatos. In le opinion del committee, le
adjuta de securitate pro le reactores del primari generation RBMK e VVER
440/230, que non pote esser meliorate a un nivello de securitate acceptabile
al communitate international a un costo rationabile, debe esser limitate a
ameliorationes de securitate de curte termino que es necesse a render los
ancora operabile. Necun prestos de Euratom pro le modernization de altere
unitates debe esser accordate sin que on obtene initialmente un clar interprisa
que le reactores RBMK e VVER 440/230 del primari generation va clauder se
definitivemente. Le planos accordate del melioration pro le reactores
operational de altere typos debe esser complete rapidemente. Le committee
finalmente sublinea le importantia de dar appoio additional al authoritates
regulatori national in le PECO e le NSI per medio del programmas de PHARE e
TACIS, con le provision que iste authoritates es juridicamente independente e
practica un cultura del autonomia.
Traducite a interlingua de "News Report" e "Direct Info" del Parlamento del
Union Europee 25-02-99 per Stanley Mulaik
---
Interlingua es un standardization del vocabulario international in
anglese, francese, italiano, espaniol/portugese, germano e russo. Le
forma del standardization es le prototypos o historic o theoretic proxime
del variantes similar del parolas international in iste linguas. Interlingua
es recommendate al populos europee como lor lingua auxiliari.
Pro plus informationes super interlingua visita
http://www.interlingua.com
http://www.interlingua.org
---
Stan Mulaik
|
