STAN MULAIK scribeva:

> Mi commiserationes va al nederlandese al perdita de un brave lucta. Il es
> frustrante a perder in un shootout, que non realmente indica le qualitate del
> equipas.  Mi congratulationes al brasilianos.  Bon joco!

Si, si, si, de facto illo ha essite le batalia del Cuppa. Un joco digne del
final. Infelicemente, post toto, le hollandeses non potera haber le secunde loco,
ma in vice illes debera disputar le 3e. con le perditor del partita de hodie
(France x Hrvatska, Francia x Croatia). Io pensa mesmo que le plus juste esserea
que il habeva un paritate in le prime loco inter Hollanda e Brasil. Ma
infelicemente le systema non lo permitte.

Illo ha essite un joco exhaustive, mesmo pro le spectatores! Hollanda succedeva
pressionar Brasil desde le initio del joco, con un forte marcation. Multe vices
le defensores debeva recular le bolla periculosemente al goalero Taffarel, perque
illes non trovava un homine libere pro passar le bolla, e le hollandeses se
approximava pauc a pauc. Hollanda, del altere latere, habeva un bon "tocco" de
bolla, il era difficile pressionar un jocator, perque ille tosto passava le bolla
a un altere. Brasil committeva multe errores, multe lanceamentos in profunditate
era troppo forte e exiva per le linea de fundo, sin que un jocator brasilian
poteva arrivar a illo. Le fin del prime tempore arrivava e le preoccupation
tension del 0 x 0 continuava.

Inexpectatemente, Brasil succedeva marcar su prime goal tosto al initio del
secunde tempore, ante le prime minuta del reinitio del joco. Qual alleviation!
Alleviation? Non tanto. Un goal de differentia nunquam es un punctuation
confortabile, e le memoria del joco del Cuppa de 1994 al SUA, quando nos habeva 2
x 0 e le hollandeses succedeva attinger le paritate, nos impediva de relaxar
completemente.

Le joco continuava, e ni Brasil ni Hollanda succedeva facer altere goal. Proxime
al fin del joco, le tension era altere: non le desiro que le equipa faceva un
altere goal, ma le desiro que le horologios se accelerava e que le joco terminava
tosto.

Ma ecce que, post un confusion con le bolla in le area brasilian, duo jocatores
disputa le bolla e illo era "sputate" al dextra del attacco hollandese, e Frank
de Boer veniva la libere pro reciper le bolla, arrivar al linea de fundo, e facer
un cruciamento intro le area brasilian, e Kluivert colpava le bolla con le
capite, sin opportunitates pro Taffarel... Paritate a 40 minutas del secunde
tempore...

Prorrogation [extra-time] con "morte subite": un goal terminarea le partita e
definirea le vincitor. Brasil habeva bon attaccos. Ronaldo duo vices avantiava
periculosemente con le bolla in su pedes verso le goal hollandese, ma in ambe
momentos, justo quando ille colparea le bolla, on le impediva. Tamben le
hollandeses mitteva espavento in nos quando duo tiros hollandese passava
"evellente tinta" al sinistra del goal de Taffarel. In duo momentos, un in cata
latere, bollas quasi entrava, impedite per colpos de capite de defensores post
que le goaleros habeva amortite le tiro que veniva verso le goal.

E al fin de plus trenta minutas de suffocation, con ambe equipas evidentemente
fatigate -- le veterano Dunga a pena ambulava, Stam habeva crampo --, arrivava le
disputa de penalitates... le lotteria del football. Taffarel succedeva
interceptar le tiros de Phillip Cocu e Ronald de Boer, e Brasil superviveva al
semifinales. 1 x 1 in le tempore normal, 4 x 2 in le penalitates. Iste es le
sexte vice que Brasil arriva al final del Cuppa, e le opportunitate de attinger
le "penta", isto es, le "pentacampionato".

Ora resta attender le secunde finalista: Francia o Croatia? Un final Francia x
Brasil esserea un grande festa, con Francia jocante "in casa", durante que
Croatia x Brasil esserea multo bon pro le anima de un pais que viveva per multe
tempore sin identitate national.

Salutes!
--
   ENSJO*: EMERSON JOSÉ SILVEIRA DA COSTA
  E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
 UIN ICQ : 713833   [* "sj" pronunciate "sh"]

INTERLINGUA - lingua auxiliar international
    Info : http://www.interlingua.com
 Grammar : http://www.nautilus.com.br/~ensjo/interlingua/english.html