DINOSAUROS PLUMATE TROVATE IN CHINA

Secundo articulos in SCIENCE de 26 de junio e _Science News_ de 27 de
junio de aqueste anno, paleontologos cercante a delinear le evolution
del reptiles a in le aves ha finalmente discoperte lo que illes cercava,
un dinosauro plumate.  Un tal creatura, secundo SCIENCE provarea finalmente
lo que multe scientistas jam crede, que le dinosauros non deveniva
totalmente extincte, mais in loco, disveloppava le volo e se evolveva a in
lo que nos nomina le aves.  Solmente duo annos retro un dinosauro esseva
discoperte con filamentos plumatoide super su dorso, mais multe recercatores
non poteva accordar se si aquestos esseva realmente plumas.

Ora un equipa de paleontologos chinese, canadian, e american assere que
illes ha discoperte le cosa real, dinosauros plumate, in ric depositos
fossile in China.  In le jornales scientific de _Nature_ e _National
Geographic_, illes describe duo species de therapodos (dinosauros carnivorose)
de grandor de un gallo de India, que clarmente possedeva le plumas, proque
iste specimenes veniva con plumas fossile.

Un fossile esseva date le nomine scientific Protarcheopteryx robusta proque
illo possedeva un anatomia plus primitive que le ave le plus primitive
usque ora cognoscite, le Archaeopteryx, de 150.000.000 annos in le passato,
trovate in lo que es ora Germania.  Le altero, Caudipteryx zoui, de que
esseva trovate duo specimenes, es plus proxime al aves.

Le fossiles trovate es clarmente therapodos e non aves, proque illes
manca certe characteristicas skeletal de Archeopteryx e aves moderne.  Le
paleontologos crede que iste dinosauros plumate non poteva volar, proque
illes possedeva relativemente curte membros anterior, curte plumas, e
un corpore duo vices le grandor de Archeopteryx.  De plus lor plumas
possedeva un forma symmetric como aquello in le aves nonvolante de hodie.
Nonobstante aqueste fossiles veniva con plumas definite.

Ben que certe palentologos non es totalmente convincite, arguente que
aqueste fossiles es de aves antique que ha perdite le poter de volar
e ha evolvite a formas similar a dinosauros, le majoritate de
paleontologos non se accorda a aquesto.  Le fossiles es clarmente
dinosauros e non aves nonvolante.

Le theoria es que si le plumas initialmente pareva super habitantes
terrestre, illos serviva alcun altere function non connecte con le
volo. Alcun scientistas opina que lanugine evolveva initialmente pro
insular le corpores de parve therapodos.  Plus tarde grande plumas poteva
servir le monstra pro attraher accopulantes.

Stan Mulaik