Car Anne e alteres,

Habente sequite le discussion re adjectivos/adverbios con grande interesse,
io deveni de plus in plus convincite que le causa del disputa es
simplemente que le contrahentes usa le parola 'adverbio' in manieras
differente.

In le grammatica traditional on parla de 'adverbio', que es un _classe de
parola_ (como 'adjectivo', 'verbo' etc.), e 'adverbial' que es un _parte
del phrase_. (Al minus isto es le nomenclatura svedese.)

Le adverbial dice qualcosa re un verbo, un adjectivo, un adverbio, o re
tote le phrase. Le adverbial _consiste_ de un adverbio, un prase de
preposition, un proposition subordinate, o - como nos ha vidite - de un
adjectivo.
Un parte de phrase que dice alique re un substantivo es appellate
'adnominal'.

Usante iste nomenclatura, in le phrases
   "Ille veniva rapidemente"
   "Ille veniva a casa"
   "Ille veniva quando illa le vocava"
   "Ille veniva lasse",
'rapidemente', 'a casa', 'quando illa le vocava' e 'lasse' es adverbiales.

Gratias a Anne io nunc comprende que 'lasse' in "Ille veniva lasse"
vermente es un adverbial, e non un adnominal, lo que deveni obvie si on lo
substitue per un phrase de preposition: "Ille veniva _in un stato de
lassitude_".

Nostre problema es que Anne usa le parola 'adverbio' pro le notion que io
hic appella 'adverbial', lo que confunde nos alteres. (E possibilemente
anque 'adjectivo' pro le notion 'adnominal'?)

Si nos qui usa le parola 'adverbio' solmente como un classe de parola pensa
"adverbial" quando Anne dice "adverbio", io crede que nos actualmente es de
accordo totes.

On pote dicer que le function de 'lasse' in le phrase es adverbial, sed su
_classe de parola_ es adjectivo.

Amicalmente
Ove

[log in to unmask]