Con respecto a characteristicas grammatic, il es le presentia o absentia
de un function, non de un forma, que es importante in determinar si un
function grammatic es absente in interlingua.  Il ha un futuro in interlingua,
mais su forma(s) (infinitivo + -a, va + infinitivo) debe esser alquanto
arbitrari proque il ha necun accordo inter tote le linguas contribuente
super iste forma.

Additional pensata super le "duple negation".  Mi "Infopedia" ha un longe
discussion de isto.  Illo indica que in anglese al tempore de Chaucer e
Shakespeare, le duple negation pro le emphase negative esseva commun in
anglese.  Alora in le 18me (non le 19me) seculo, sub le influentia del
logicos, su usage esseva criticate como un negation que se destrue per
illo mesme: on usa le analogia del multiplication como ha Arturo,
-1 x -1 = +1.  Mais in realitate, illo representa non le multiplication
mais le addition, -1 + -1 = -2.

Le negation duple ancora existe in le anglese, mais non in formas "docte".
Si on usa lo, como in, "I'm not never noway going to do that again!" il
va marcar vos como un rustico.

Totevia, le parlantia rustic es a vices indicative de un plus antique forma
del lingua.  Io es surprendite que le negation duple non existe in le
svedese, proque su existentia in le anglese antique suggere que illo es
un forma germanic, e consequentemente que illo existe in altere linguas
germanic.

Possibilemente le grammaticos e logicos ha influite le svedese tanto ben.

Le question pro interlingua es si le function de multiple negationes pro
le emphase negative es absente in al minus un del linguas contribuente.
Es illo absente in le germano o le russo o le francese?  Illo existe
in le anglese.


Stan Mulaik