Un Visita al Ecclesia Pentacostal del Assemblea de Deo
pro le Dedication de mi secunde granfilia de mi filio
Roberto.

Ben que americanos (statosunitese) es regardate como
materialistas, in realitate le grande numero del population
es spiritual e religiose.  Multe milliones va cata
Dominica a un del numerose ecclesias in le Statos Unite.
Iste ecclesias varia del ecclesias traditional como
le Ecclesia Roman Catholic, le Episcopalianos (le Ecclesia
de Anglaterra) e Lutheranos (que ha justo jungite se
ecumenicalmente), le Ecclesia Unite de Deo,
le Methodistas e le Baptistas del Sud, al numerose
parve denominationes e sectas, como le varie Pentecostal
ecclesias.  Mi filio Roberto ha jungite se a un ecclesia
pentecostal, Le Assemblea de Deo, de su sposa.  Mi altere
filio, Stephano, se adhere al ecclesia de su sposa, le
Baptistas del Sud.  Io e mi sposa frequentemente ha
assistite al ecclesia de mi prime filio, le 2nde
Ecclesia Baptista de Ponce de Leon, que es un del plus
grande ecclesias in le centro de Atlanta, a que pertine
multe familias prospere.  Aquelle ecclesia ha multe
celebrationes musical como a Natal, e mi filio e su
sposa canta in le choro.  Le Natal passate, lor nove
filio, Christopher, esseva le baby Jesus in lor
Spectaculo de Natal, un rolo excellente pro ille proque
ille es un baby multo calme qui rarmente crita.  E lor
spectaculos religiose es multo bon e professional, proque
illes usualmente es accompaniate non solmente per le
organo traditional, mais per un parve orchestra symphonic
con musicos del Symphonia de Atlanta. Mais in multe altere
respectos il non ha multe participation del congregation
in le ceremonias.

In contrasto, le ecclesia de mi altere filio, Roberto,
es plen de participation individual.  E il ha multe
emotion, e canto, con armas levate in le aere.

Mi sposa e io arrivava al ecclesia de Roberto iste matino
un hora medie ante nostre tempore designate de arrivata.
Nos se sedeva in nostre automobile in le parco de
automobiles del ecclesia.  Nos notava un autobus que
pertine al ecclesia tam ben in le parcamento, con un
signo de su latere "Dos caminos, un elecci—n, elige a Christo"
in espaniol e anglese.  Io rememorava que Roberto habeva
viagiate a Columbia in Sud America pro un septimana con
plure homines del ecclesia brevemente post ille e su sposa
habeva jungite se al ecclesia. Illes habeva adjutate un
parve congregation alla a construer un schola.  Frequentemente
lor denomination succede in paises predominantemente catholic
como Columbia in missiones al povre.  E illes adjuta les
a meliorar lor circumstantias, como in construer scholas e
ecclesias.  Tal gruppos pentecostal ha essite multo
succedite in crescer in America Central e del Sud per offere
un message de sperantia e le amor de Deo e labores a meliorar
lor communitates per autoassistentia.

Finalmente nostre filio habeva arrivate con su familia,
Lori (su sposa), Mallory (su prime filia de 3.5 annos),
e Madeline, un baby de 4 menses. Accompaniante les esseva
le cosinas Danny (15) e Megan (11).  Le patre de Lori
arrivava in su automobile quasi immediatemente.

Il habeva 1000 horas e le ceremonia non comenciava usque
1100.  Mais nos esseva alla pro reciper instruction del
sposa del ministro como nos esseva a prender un parte in
le ceremonia in le dedication de tres babys del congregation,
un de que esseva Madeline.  Nos sedeva nos al fronte del
congregation.  Al fronte de nos esseva un scena levate,
attingite per un grado circa illo.  Super le scena esseva
un podio pro le ministro. Al anterior e a basso del scena
esseva un loco pro un parve banda, con un piano electronic,
gitarra, e tambur.  Mesmo plus anterior del scena del fronte
esseva un altere scena con sedes pro le choro, e un altar
con un grande cruce de ligno montate super le muro. Le
choro non appareva iste die. On diceva que illes visitava
un altere ecclesia.  Nonobstante il habeva musica.

Le sposa del ministro esseva multe informal e amical.
Al posterior del ecclesia esseva un altere scena
elevate, con multe equipamento electronic.  Post explicar
ubi nos debe star durante le Dedication de Madeline super
le scena al fronte, nos nos sedeva.  A iste tempore un
pianista sonava le piano electronic.  Le melodia esseva
multo moderne, con rhythmos syncopate, mais molle, como
on trovarea in un jazz bar in un grande citate.  Un grande
schermo se suspendeva del tecto al fronte del congregation,
e un projector del posterior del congregation projiceva
images generate per computator - images del babys in le
ceremonia a venir - annunciamentos.

Le congregation gradualmente cresceva con le passage
de tempore.  Tres juventutes, duo pueras e un puero, cantava
mollemente in le rhythmos syncopate un canto religiose,
usante microphonos al scena del fronte.  Illes esseva
destinate a cantar per le ceremonia a varie punctos in
loco del choro.

Finalmente circa 1100 horas, un juvene homine, le ministro
adjutante, parlava al congregation, "Lassa nos comencia!"
Le musica comenciava un nove canto, equalmente moderne in
su rhythmos syncopate, e subitemente super le schermo al
fronte del congregation pareva le parolas, projecte del
posterior del congregration, e le congregation comenciava
a cantar le parolas, in versos repetite.  Multe juvene
homines e feminas e juventutes veniva spontaneemente al
fronte del congregation a cantar, lor armas elevate in le
aere con facies in raptura.  Le juvene ministro conduceva
le congregation per iste canto plure vices.

Nos cantava plure altere cantos.  Io notava que le parolas
de iste cantos faceva emphase del amor de Deo pro cata individuo,
e le amor de cata individuo pro Deo.  De facto, per le integre
ceremonia e le sermon mesme, le thema esseva le amor de Deo
e le admonition a amar tote le mundo.  Il equalmente habeva
un tempore pro personas con anxietates e difficultates in lor
vitas quotidian a venir al fronte pro reciper le benediction
del congregation e parolas de appoio.

Alora veniva le vice de dedicar le babys.  Le familia de
cata baby esseva mandate a venir al fronte al scena elevate
a star alla pro le congregation a vider.  Nos prendeva nostre
positiones al scena.  E le ministro principal vadeva a cata
familia e prendeva le baby in su armas e poneva su mano super
le capite del baby e diceva un benediction.  In le interim
al amusamento del ministro e le congregation Madeline discoperiva
le digito del ministro, que illa capeva in su bucca.  Como
cata baby esseva dedicate, un imagine del baby, facite per le
sposa del ministro ante le ceremonio per un camera digital,
appareva in le schermo al fronte, pro lassar le congregation
haber un bon imagine del baby.

Post le Dedication del Babys, il habeva un altere canto.  Alora
tote le mundo al scena al fronte quietemente partiva, lassante
solmente le ministro principal, un homine de bon humor e
informalitate.  Ille comenciava su sermon, e como ille comenciava,
un linea principal de su sermon appareva in le schermo.  Illo
esseva un sermon per Powerpoint! Isto esseva multo facilitative
de su message.  Le thema esseva bonitate e benevolentia.  Deo
vole que nos vive vitas benevolente verso le un le altere.
Nos debe apprender a esser benevolente in nostre maritages, verso
nostre filios e filias, e a tote le mundo.  Certemente nos va
haber frustrationes e tempores de ira, mais nos debe lassar los
de nos in un maniera que honora Deo.  Nos debe esser caute del
poter de nostre parolas a injuriar alteros; stoppa ante que
on dice alque mal a un altero.  Le amor que nos exprime es le
amor de Deo.  Nos pote meliorar nostre vitas si nos labora
a facer actos de benevolentia.

           Ille contava un conto de un homine
qui esseva un agnostico, e quando su filio demandava si il
existeva un Deo, ille respondeva que ille non sapeva.  Su
filio alora obteniva un ballon parve del casa, plen de helium,
e ille attachava un carta al corda con un message a Deo a revelar
se si ille existe.  Alora le ballona esseva lassate in alto in
le aere.  Duo dies postea le homine conduceva su automobile e
ille notava un signo, "Libere Lavatura de Vostre Automobile", e
ille conduceva su auto in le loco.  "Vermente, dice me," ille
demandava al homine alla, "que es le artificio?" "Nihil.  Nos
lava vostre automobile libere proque isto es un acto de
benevolentia.  Nos face isto pro le amor de Deo."  Alora le
homine in le automobile subitemente rememorava su filio e le
ballon e le question.  "Ah ha, isto es le responsa al question
de mi filio, si il ha un Deo."

        Le ministro avantiava per su
linea principal de punctos lentemente, illustrante cata un con
un breve conto.  Verso le fin de su sermon ille contava un
historia de un povre studente de un inseniante, qui post
un comenciamento excellente in le prime duo grados, pareva a
faller in su interessa.  Quando iste inseniante recipeva le
studente in le 5nte anno, tote le altere pueros non voleva
jocar con ille, e ille habeva necun interessa in le schola.
Mais le inseniante legeva su archivo, e alla illa apprendeva
que su matre habeva morte al fin de su secunde anno in le schola.
Postea ille habeva perdite interesse in le schola.  Su patre
le dava parve adjuta.  Le inseniante decideva a violar su
regula a tractar cata studente equalmente.  Illa pagava multe
attention a ille durante le anno. E ille respondeva in meliorar
su grados e su attitude.  Al fin del anno ille esseva le tertie
in su classe.  E quando cata studente dava le inseniante un
dono al fin del anno, le puero dava un dono inveloppate in
le papiero brun de un pachetto del specieria.  Le altere
studentes rideva a su dono, mais le inseniante les admoniva
e aperiva le dono.  In le dono esseva un pecia de joieles de
costume, con alcun joeiles de vitro perdite, e un bottilia
plen a medietate de aqua de Colonia.  "Aquello esseva le
Colonia de mi matre" diceva le puero. Illa esseva placite.
Al fin del die post que
tote le altere studentes habeva partiva, le puero remaneva, e
ille diceva al inseniante, "Vos esseva le melior inseniante que
io jam ha habite".  Le sequente annos, ille vadeva al schola
secundari e succedeva multo ben.  Alora ille vadeva le universitate
e finiva al tertie loco in su classe.  Cata vice ille inviava le
inseniante un littera e indicava que ancora illa esseva le
melior inseniante que ille jammais habeva.  Finalmente ille
inviava un littera in que ille indicava que ille habeva complete le
education a devenir un medico.  Un breve tempore post isto le
inseniante recipeva un littera del medico con un invitation a
venir a su nuptias e a seder in le sede que es normalmente
aquello del matre del sponso.  E illa lo faceva.  E illa sedeva
se in aquelle sede e portava super su vestimento le joieles
e aqua de Colonia del matre del puero.

Tal contos es pur "Reader's Digest", mais illes semper evoca un
lacrima in mi oculos.  Io es sentimental.

Le ministro finiva su sermon in un tono molle.  Alora tote le
congregation stava e sequeva in un precaria.

Postea le familia de Madeline vadeva per le autostrata 32 km verso
un restaurante non lontan de nostre casa e al via de mi filio
a su casa plus lontan secundo le autostrata.  Illo esseva un
buffet chinese!  Nos originalmente voleva vader al restaurante
italian "The Olive Garden", mais quando nos arrivava, on diceva
que il exigeva un attendentia de un hora e medie.  (Le Methodistas
habeva arrivate prime - le costume de americanos es a vader a
un restaurante post le ecclesia).  Mais le buffet chinese esseva
proxime al restaurante italiano, e il esseva possibile a seder nos
immediatemente e obtenir nostre proprie nutrimento, que esseva
deliciose.  Io mangiava troppo.

Un Dominica Statosunitese a toto de vos!

Stanley Mulaik