MARMITAKO

Il ha multe formas de cocinar le "marmitako". Hic vos pote leger le recepta
de Conchi Alvarez Sagastibelza, publicate in le libro "Cocina mediterránea"
(R&B ediciones), plus de alicun commentario que io ipse ha addite.

INGREDIENTES

* 1200 grs. de bonito (thuno)

* 1 kilo de patatas

* 500 grs. de tomates

* 200 grs. de pimentos rubie

* 6 pimentos verde

* 1 cipula

* 10 dentes de alio

* 12 coclearatas de oleo (si illo es possibile, de oliva)

* 1 coclearata de farina

* 1 coclearata de paprika

* 6 trenchos multo tenue de pan

* 1 pimento verde (typo chili)

* sal

PREPARATION

Pella e munda le patatas. Postea, face fragmentos parve como un nuce e pone
los in un olla, coperite de aqua per cocer los. Pone le pimentos verde e
rubie in le furno, e quando illos es rostite, pella los e seca los facinte
listas.

In un patella con duo coclearatas de oleo frige le pimentos e le dentes de
alio. Lassa los prender lentemente un color aurate durante vinti minutas. In
le oleo restante frige le cipula e alicun dentes de alio multo hachate, in
le principio lentemente e postea plus rapidemente, ma movinte los pro non
torrer los. Quando illos es colorate adde un coclearata plan de farina, e
postea un minuta adde le paprika. Move toto e adde le tomate pellate e multo
hachate. Lassa lo bullir durante vinti minutas, e postea adde le pimentos e
lassa lo cocer durante cinque minutas plus. Postea coce le patatas e dum
pella le "bonito", le qual debe esser dividite in fragmentos plus parve que
illos de patata, e condimenta lo. Quando le patatas es cocite, adde le
"bonito", ma sin mover lo. Postea cinque minutas, incorpora le contento del
patella e anque le pimento typo chili (nos dice "guindilla") in fragmentos
parve. Finalmente adde le trenchos de pan e lassa lo cocer durante cinque
minuta.

Vos pote simplificar le recepta usante bon pimentos de latta (io usa los,
super toto le pimentos "del piquillo", facite in Navarra, ma vos pote
utilisar illos que vos prefere).



Ignacio Martínez Recari

Arbizu 6, 4C

31014 Pamplona (Navarra)

Espania

[log in to unmask]