Car amicos,

Si nos vole evalutar le valor de un theoria scientific como p. ex. le
theoria de Darwin (qui non esseva un dilettante, como Jo assere!), nos non
debe facer nos confunder ni per conceptiones erronee del communistas russe
(p.ex. le theoria biologic false de Lysenco), ni per le racismo violente de
Hitler, ni per qualcunque altere folle misinterpretation.

Determinative es: esque le theoria del evolution es sufficientemente
supportate per le factos e esque le theoria pote explicar iste factos? Io
vide que numerose tal factos existe e que lor numero cresce cata die per le
labores del scientistas. E on ha jam potite discoperir plure mechanismos que
explica le evolution, ben que non jam tote le mechanismos es clar. Le labor
non jam es finite!

Que es le alternativa del theoria de evolution? Isto es le creationismo, que
in le curso del ultime medie seculo ha recrutate multe adeptos in le Statos
Unite, p.ex. H.M.Morris, "The Beginning of the World", J.C. Dillow, "The
Waters Above: Earth's Pre-Flood Vapor Canopy", J.C. Whitcomb, "The World
that perished", e plure altere autores. Multes inter illes es involvite in
un gruppo de creationistas, le "Institute for Creation Research (ICR)".

Iste creationistas trova lor "veritate" in le ancian mythos del prime libro
del Biblia, Genesis. Illes los considera como le ver parola de Deo. Illes
vole facer nos creder, io resume brevemente, que:

1. Le terra ha essite create ante circa 10 000 annos. Alora Deo ha
"separate" le aquas, un grande parte de iste aqua ha disparite in le "cavas"
del solo, un altere parte se ha locate super le atmosphera in forma de un
spisse strato ("canopy") de calidissime vapor de aqua.
2. Durante quasi 6000 annos le terra esseva un sorta de paradiso agradabile
sin ventos, con sempre un celo toto clar sin nubes. Tote le animales esseva
herbivoros.
3. Ante 4350 annos Deo ha rumpite le equilibro existente, de sorta que non
solmente le cavas de aqua in le terra ha erumpite, ma que anque le vapor de
aqua super le atmosphera se ha condensate subitemente e un pluvia ha cadite
"durante 40 dies" super le superficie del terra: le DILUVIO!
4. Immediatemente post le diluvio, que ha durate un anno, un parte del
animales laxate per Noach se ha cambiate in carnivoros.

Si on avantia un tal "theoria" on debe appoyar lo per factos.
Regrettabilemente pro Morris etc. tal factos non existe e altere factos
contradice lor theoria, p.ex. on pote demonstrar clarmente per
investigationes seriose que le etate del terra non es 10000 annos, ma 4,5
milliardos de annos. E si on les invita a explicar le mechanismo que ha
cambiate herbivoros in carnivoros, illes non ha un explication scientific,
nam il es le poter de Deo que lo ha facite.

Naturalmente, il ha un massa de americanos que se ha opponite al
conceptiones creationistic. In multe libros on pote leger lor objectiones.
Un libro multo instructive es le obra de Lee Tiffin,"Creationism's
Upside-Down Pyramid". LeeTiffin es un professor de Physiologia de Plantas
del Universitate de Maryland. Ille ha travaliate pro un numero de agentias
statal del USA. Ille ha anque un "Master's of Divinity" e ha essite un
pastor in un numero de ecclesias christian.

Piet Cleij