Car Amicos,
io ha legite:
-------------per Allan Kiviaho 981110 LavM-8NA ---------------
Mi puncto de vista es que le interlinguanistas debe haber un "strategia de
duo inimicos", anglese e esperanto, como le Armija Krajowa de Polonia, cuje
inimicos era Germania e le Union Sovietic durante le anno tragic e fatal,
1944.
Le USA ha le grande avantage de haber un moneta e un lingua universal,
anglese. Post 51 dies le Union Europee etiam ha un moneta, euro, sed nos
besonia etiam un lingua universal in addition al numerose linguas national.
Un parve compania industrial in Lapponia, Finlandia, debe poter communicar
con un compania parve in Grecia sin specialmente trainate traductores.
Nos europeos continental non pote haber anglese como lingua franca proque:
1. Anglese con su phonetica multo peculiar non es conveniente al nationes
de Europa continental. On non pote presentar le nomines de personas e
localitates de Europa continental correctemente in anglese, le nomines
deberea esser anglificate. Isto nos non vole.
2. Nos europeos debe haber un identitate europee, un feritate (orgolio)
europee. Nos non vole esser un colonia del USA (Sed nos pote esser alliatos).
Nos debe haber un lingua universal que ha su radices in le historia de
nostre cultura. Iste radices son in latino, le lingua del Imperium Romanum.
Nos non pote haber esperanto como un lingua universal proque esperanto non
es nobile. Illo es un lingua multo fede con su -aj, -oj, -ajn, -ojn. E
esperanto es bastardic con su bizarremente e arbitrarimente selecte parolas
ex varie linguas sin ulle consequentia.
Il ha un hereditario de traditiones roman, un lingua belle, nobile,
melodic, rhythmic - INTERLINGUA!
Que vive interlingua!
Allan Kiviaho
AFIL - Association Finlandese pro Interlingua
----------------------------------------------------
e io es felice e de accordo con Allan, o melio, io es de accordo con Allan
pro su enthusiasmo e su amor pro le traditiones roman, le latino como
lingua del Imperio Roman, interlingua como le latino de hodie.
Io judica le amor de Allan pro le Imperio como manifestation del unitate
inter le populos e toto illo que uni il es positive.
Si io scriberea in Italia como Allan io currerea periculo de esser
classificate de extreme dextra, fascista pro intender nos, e judicate
rhetorico. Le duo cosas serea incommodate.
Allan celebra le victoria, nos in Italia ha recente motivos de haber
rendite ridicule nostre passato.
Pro me le USA non ha le anglese como lingua universal e, in le futuro nos
non habera pais monolingua. In Italia nos sera plus arabos, africanos,
asiaticos e illo sera inevitabile.
Pro fortuna Allan recommenda un lingua universal in addition pro le Union
Europee, per exemplo interlingua. Io es de accordo pro interlingua e le
mantenimento de nostre cultura, a Treviso io intende, de Treviso, veneta,
italiana e, como nove e commun, interlingua.
Io confide in le suprematia del melior e nos non habera colonias; io
constata que le immigratos a Treviso assimila nostre cultura. Scriber de
immigratos a Treviso il era inconcipibile sol dece annos retro. Ora le
immigration es un realitate que nos non pote arrestar.
Nos ha le replica de quanto eveniva in le Imperio Roman, le mytho que
supervive in Allan e que le suggestiona.
Con le tempore il se formara un nove vulgar e pro me es precioso citar vos
qualque proba historic del vulgar italiano in su formation.
Enigma de Verona (Veneto), circa X seculo: "Se pareba boves - alba pratalia
araba - albo versorio teneba - negro semen seminaba" e isto: "Illos era
similante a boves - illos arava blanc pratos - illes teneva un blanc aratro
- illes seminava un semine nigre".
Solution: manos, penna e tinta.
Textos italian que contine elementos latin que ancora on ben distingue:
Capua, martio 960: "Sao ko kelle terre per kelli fini que ki contene,
trenta anni le possette parte Sancti Benedicti."
Sessa, martio 963: "Sao cco kello terre, per kelle fini, que tebe monstrai,
Pergoaldi foro, que ki contene, et trenta anni le possette."
Teano, julio 963: "Kella terra, per kelle fini, que bobe mostrai, sancte
Marie è, et trenta anni la posset parte Sancte Marie."
Teano, octobre 963: "Sao cco kelle terre, per kelle fini, que tebe mostrai,
trenta anni le possette parte sancte Marie."
A quando ascende vostre vulgar?
Mi conclusiones: nos non ha necessitate de confrontar nos con factos
historic quia illos son tanto e tal e illos resumera nostre partitiones.
Nos ha necessitate de cohesion. Le USA gravitara in Europa. Le anglese se
ha ponite in le via del latino, nos habera su dialectos. Necuno lassara su
lingua matre, ma le lingua sera sempre minus integre. Nos movera nos de
minus, ma le info (informationes) sera sempre plus international e le
vulgo, vos cognoscera Pomo, rendera popular un lingua universal.
Interlingua?
Le vulgo vive, nos ha tempore pro disputar.
Vive Interlingua,
Mario
Mario Malaguti
mailto:[log in to unmask]
Informatica GI Srl
Strada Bibano, 9 - 31100 Treviso (Italy)
tel. (+39) 0422 420790 - fax (+39) 0422 420789
http://www.i-gi.com
http://www.telegrupigi.com
http://www.informaticagi.it
http://www.affresco.com
Le 11 de novembre del 1998.
Revisiones del texto, links al pagina:
http://www.telegrupigi.com/interlingua/19981111.htm
Le participation es sollicitate.
|
