Car amicos,
Hodie io ha recipite de Karel Wilgenhof un lista del nomines de 451 species
de aves europee. Un introduction explicative accompania le lista. Pro me le
lista es un surprisa benvenite, nam jam desde plure annos que essaya de
trovar nomines apte pro aves. In mi dictionarios io ha inserite jam un
assatis grande numero. Ma le lista de Wilgenhof significarea que in un nove
edition de mi dictionarios io poterea inserer quasi omne nomines del aves
europee.
Hic infra io vos presenta le introduction per Karel Wilgenhof.
LISTA DE NOMINES IN INTERLINGUA PRO 451 SPECIES DE AVES EUROPEE
Secundo ornithologos, le scientistas qui se occupa del aves, il ha circa
450 species de aves in Europa e omne istes ha lor nomines proprie in
anglese, in francese, in italiano, in espaniol, etc. Il es rationabile que
illos debe esser identificabile per nomines specific etiam in Interlingua.
Il jam existe un nomenclatura scientific international pro omne animales e
vegetales. In iste systema le nomines es formate de parolas latin,
grecolatin e etiam con nomines latinisate. Es isto non usabile in
Interlingua?
Il pare non practic usar per exemplo "Somateria mollissima" in loco de
eider" e "Stroptopelia turtur" in vice de "turture" in le lingua quotidian,
in tanto que nomines de aves appertine al lingua costumari de usatores de
Interlingua. In le nomenclatura scientific le nomines consiste normalmente
de duo parolas. Le prime indicarea le gruppo de species apparentate e le
secunde le specie ipse. Assi il ha pro le aves del familia Motacillides:
Motacilla alba, Motacilla cinerea, etc., sed etiam Anthus campestris,
Anthus cervinus.
Determinar nomines in Interlingua fundate super nomines in le linguas de
controlo non es semper facile. Que pro exemplo eliger pro It oca granaiola,
Es ansar campestre, Fr oie de moissons, An bean goose, Ge Saatgans (Anser
fabalis) e pro le ave cognite per It. piovanello, Es correlimos zarapatin,
Fr. Becasseau cocorli, An curlew sandpiper, Ge Zwergstrandlaufer (Calidris
ferruginea)?
Le sequente lista contine nomines scientific pro 451 species de aves
europee con proponite nomines in Interlingua, basate super fontes
ornithologic que los mentiona in italiano, espaniol, francese, anglese,
germano. In le selection me adjutava etiam un serie de traductiones in
italiano fornite in 1978 per Hugo Pellegrini. Alicun nomines esseva etiam
trovate in le Interlingua English Dictionary e in le dictionarios de
P.Cleij.
Il es probabile que correcturas e meliorationes in le hic presentate lista
son possibile e etiam recommendabile.
K.
WILGENHOF
Io invita interlinguistas interessate a comenciar un discussion super iste
subjecto in le coollist. Io es preste a inviar per posta gastropode copias
del lista a tote le interessatos. Hic infra io vos presenta como exemplo le
prime vinti-sex nomines.
Salutes amical de Piet Cleij
NOMINE SCIENTIFIC INTERLINGUA
Accipiter brevipes Sparviero brevipede
Accipiter gentilis Astor
Accipiter nisus Sparviero
Acrocephalus agricola Acrocephalo agricole
Androcephalus arundinaceus Acrocephalo turdoide
Acrocephalus dumetorum Acrocephalo de Blyth
Acrocephalus melanopogon Acrocephalo mustachiate
Acrocephalus paludicola Acrocephalo aquatic
Acrocephalus palustris Acrocephalo palustre
Acrocephalus schoenobaenus Acrocephalo de junco
Acrocephalus scirpaceus Acrocephalo .....
Aegithalus caudatus Paro a cauda longe
Aegolius funereus Strige de Tengmalm
Aegypius monachus Vulture monachin
Aix galericulata Anate mandarin
Alauda arvensis Alauda campestre
Alca torda Alca
Alcedo atthis Martin piscator
Alectoris barbara Perdice barbare
Alectoris chukar Perdice chukar
Alectoris rufa Perdice rubie
Alle alle Parve alca
Alopochen aegyptiacus Oca egyptic
Amandava amandava Bengali rubre
Anas acuta Anate acute
Anas americana Anate american
|
