Car Christian Weisgerber,

1. Io comprende tu problemas, Chistian. Tu pote facilemente leger le textos
in interlingua que tu trova in le listas de INTERLNG e alteres, ma pro
scriber le lingua correctemente, tu debe consultar un dictionario. Ma il me
pare toto normal que al initio on debe consultar sovente un dictionario.

Io te consilia leger attentivemente alicun libros in interlingua, dunque
alicun centos de paginas consecutive.  Alora on se familiarisa tosto al
lingua, de sorta que pro le uso active on besonia le dictionario solmente
in certe casos.  Il va sin dicer que on debe leger attentivemente anque un
grammatica de interlingua, p.e.
Gode-Blair, INTERLINGUA GRAMMAR (in lingua anglese),
o
Wilgenhof, GRAMMATICA DE INTERLINGUA (in interlingua)

Libros que es multo agradabile a leger es le obras que Bian Boalt ha
traducite in interlingua:
Buzzati, TRES NOVELLAS,
Collodi, LE AVENTURAS DE PINOCCHIO,
Tchekhov, MI VITA,
etc., etc., etc.
A consiliar es anque le quatro libros original per Toma Macovei.

Omne iste libros e MULTE, MULTE alteres es acquiribile al Servicio
de Libros, Zonnegloren 30, 7361 TL Beekbergen, Nederland. Le gerente,
Frits Goudkuil, es preste a inviar te immediatemente le "Bibliographia de
Interlingua", que contine le titulos de OMNE libros que on pote comprar,
anque le "Interlingua-English Dictionary", le "Interlingua Grammar" e le
"Grammatica de Interlingua".

Pro accustomar te jam un pauco al lectura de interlingua, tu poterea
comenciar a leger le textos que le UMI ha publicate in su sito
INTERLINGUA.COM.

2. Le parola "planlingua" non es interlingua. Io prefere "lingua planate"
o "lingua construite".

3. Tu scribe que tu face errores. Io debe dicer te que le errores in tu scriptos
es assatis rar. Io te felicita pro tu linguage clar e comprensibile!

Salutes amical de Piet