Le sequente es excerpte e traducite de un articulo in le
Atlanta Journal del 19 de septembre 2001.  Le articulo
esseva per Jim Galloway.

"Quando Housh Rahimzadeh videva le secunde avion a jecto
cade a in le Centro de Mercantia Mundial, ille sapeva
exactemente lo que sequerea.  Ille voleva dicer in
le aure de un commandante del salvatores pumperos que
ille debe retener aquelle pumperos foras le turres.

Mais iste ingeniero structural esseva in Atlanta,
telespectante le television al 46te nivello de un
altere alte edificio, e ille non poteva facer alque
altere que a observar le leges del physica facer lor
travallio fatal e inevitabile.

"O Deo!" esseva toto lo que Rahimzadeh poteva dicer
como ille observava le turres que esseva symbolos
del poter e ricchessa de Nove York transformar se
initialmente a in icones de vulnerabilitate, alora
a in deces de milles de tonnas de fragmentos de
briccas e aciero, con 5.000 gentes interrate infra.

Rahimzadeh es le chef ingeniero del firma
architectual de John Portman & Associates, in Atlanta,
que designa e construe le grattacelos.

Complete in 1973, le turres del Centro de Mercantia
Mundial esseva le plus alte edificios in le mundo
pro solmente duo annos.  Alora le titulo del
plus alte passava al Turre Sears in Chicago.  Le
Gemine Turres Petronas in Malaysia ha essite le
plus alte in le mundo depost 1996.  Illes equalmente
esseva evacuate post le assalto terrorista in Nove
York.

John Portman, de 76 annos, recognosce que le codices
de construction de edificios va cambiar como un
resultato del collapso del turres de 110 nivellos
del Centro de Mercantia Mundial. Il require 80
minutas a descender le scalas in un edificio de
80 nivellos, ille notava.  Le milles de occupantes
sin vulneres in Turre nro. Uno possedeva solmente
104 minutas a descender 110 nivellos.  Le occupantes
de Turre nro. Duo habeva solmente 47 minutas.

Le grattacelos de Atlanta haberea date lor obreros
de officios plus tempore, diceva Portman.  Lor
construction es plus resistente del foco.  Ille
demandava que su chef ingeniero explica lo que
ha occurrite in Nove York e como Atlanta haberea
comparate a isto.

Housh Rahimzadeh habeva in fronte de ille un quadro
vitro de aqua, un modello perfecte de como cata
del turres del Centro de Mercantia Mundial ha
essite constructe.

Quasi tote le integre peso del structura de aciero
esseva portate per le quatro lateres del turres,
como le lateres del vitro.  Il habeva un corde
pro le elevatores, mais necun supporto transverse
in le turres.

Cata edificio es constructe con alcun disastro
in mente.  Le CMM esseva constructe a indurar
un huracan con ventes de 150 millias per hora.
Le designo como le vitro de aqua faceva possible
le edificio a flexar un poco a cata nivello durante
que le edificio remaneva rigide generalmente. Al
alto del turres, le turres oscillarea solmente
un metro.

Le designo habeva su avantages le 11 de septembre.
A causa de lor cordes molle, ambe turres
succedeva in absorber le choc de un grande
avion a jecto, justo como lor designator habeva
vantate que illes poteva.  Il esseva le calor
generate per milles de gallones de combustibile de
base kerosen que ha provate a esser tanto fatal.

Aquello esseva lo que Rahimzadeh, qui esseva
familiar con le designo del CMM poteva previder
in su apparato de television.  Durante alcun
foco, un plano in un edificio alte debe mantener
su integritate pro duo horas.  Mais in le
supercalorate turres del CMM, aquello non
haberea occurrite.  Quando le structura de aciero
attingeva un certe temperatura, illo subitemente
transformava se a plastic.  E proque del manco
de interior supportos transverse, fallimento
esseva total como cata plano collabeva al
plano sub illo.

Ni Rahimzadeh ni altere ingenieros o architectos
habeva alcun critica del designo del CMM. Mais
in aquelle momentos cruce, diceva Rahimzadeh,
"si alcuno habeva consultate un ingeniero
de construction, ille haberea predicte le
evenimentos a sequer."  Al proprie tempore,
e con proprie reguardo al heroismo monstrate
per le salvatores pumperos, le ingeniero diceva
que le authoritates debe studiar le decision
a commandar le pumperos con multe equipamento
a entrar le secunde turre.

Le sito del impacto del avion a jecto esseva
un hora distante per via del scala interne.
Necuno habeva un possibilitate de attinger
le foco o le ferite ante le collapso, ille
diceva, e le carga ascendente del salvatores
possibilemente reduceva per un medie le
numero de obreros qui esseva capace de
descender per le mesme scala al sortitas de
emergentia.

In un typic grattacelo in Atlanta de 50
nivellos, il requirerea solmente 30 minutas
a descender al base del edificio. Mais
Rahimzadeh es secur que ille haberea plus
tempore que isto si necesse.  Malgrado lor
apparentia differente externe, quasi tote
le grattacelos de Atlanta ha in commun
duo characteristicas cruce: un solide corde
al centro, con supporto transverse al
exterior, e un structura de beton reinfortiate
con aciero.  "Le beton reinfortiate possede
multo plus redundantia in illo. Tu obtene
alcun adjuta que tu non expecta."

Le beton reinfortiate non arde.  De plus
e mesmo plus importante es que quando illo
suffre le damno de calor, illo falle
lentemente per grados in loco de subitemente.
"Si alque similar a lo que occurreva in Nove
York occurreva in Atlanta, tu haberea plus tempore
pro evacuar."

Mais le architectos de alte edificios crede
que le beton ha certe disavantages.  Illo
deveni plus impractic pro edificios plus alte
que 60 a 80 nivellos--le transporto e
deposito del beton deveni mesmo plus difficile.
Le majoritate del nove grattacelos de Atlanta
es approximemente le mesme grandessa, non
multo plus grande que 50 nivellos, un altitude
reguardate como le proprie balancia inter
le costo e le efficientia.

"Il ha un dicto inter architectos que es
ancora ver," diceva Rahimzadeh.  "Cinquante
nivellos es bastante alte, le resto post
aquello es ego."

Traducite e abbreviate per Stan Mulaik