Mi littera anterior me ha facite pensar a iste cosas.

Como io contava hic in le lista in le initio de mi participation, post
desanimar me con Esperanto e ante cognoscer Interlingua, io mesme voleva
construer un lingua con aspecto (neo)latin. Io prendeva mi dictionario
de latino, reguardava le parolas e imaginava quanto al forma final del
parolas in "mi" lingua.

Io pensava a eliminar totalmente le vocales final del parolas, pro
accelerar le pronunciation per evitar un syllaba additional al fin del
parola. Ma a vices io non credeva que isto era bon, e io pensava a
mantiner un -E final.

Un de mi problemas era justo le problema del final -C. Si io retinerea
un -E post le ultime consonante, adjectivos como MAGICUS devenirea
MAGICE (con pronuncia MÁGISSE).

Io pensava a scriber MAGICHE o MAGICKE o MAGIKE. Ma isto non me placeva
totalmente.

Finalmente io cognosceva Interlingua e desisteva de tentar crear mi
lingua, e io videva le solution de IALA pro mi problema del -C final.
Interessante, eliminar le -E justo ubi ille causarea problemas.

E es interessante vider le consequentias: pro facer le adverbio con
-MENTE, on senti besonio de un vocal, ma non es le -E neutre que entra
(de novo, pro evitar le pronuncia de -CE- como -SSE-), ma le -A original
del adverbios del linguas neolatin: TRAGIC-A-MENTE.

Pro illes qui non lo sape, iste adverbios con -MENTE deriva ab un
expression latin como, per exemplo "TRAGICA MENTE" = "con un mente
tragic". Le -A in TRAGICA es perque MENTE es un parola feminin in
latino, e le adjectivo latin concorda con le substantivo.

-----
Isto me rememora que io senti alique estranie in adjectivos de
Interlingua ubi le termination de genere -US, -A, -UM ha essite
substituite per nihil, in vice de -E. Si, iiiiiille regula de -R, -N,
-L, ja nostre amico.

Le regula functiona ben in multe parolas. Me place poter dicer NA-TIÓN e
non NA-TIÓ-NE. (Disconsidera hic le effecto del -E in le accentuation.
Io me refere al quantitate de syllabas.) Le -IS del parola latin NATIO,
NATIONIS ha devenite un -E debile que non superviveva in le linguas
moderne (excepte italiano, un lingua que apprecia vocales final): Port
NAÇÃO, Esp NACIÓN, Fra+Ang NATION, Ita NAZIONE. E justo iste -E debile
del latino era multo frequente al fin post -R, -N, -L: CANTOR(E),
NATION(E), ANIMAL(E).

Ma in Interlingua tamben le final -US, -A, -UM ha devenite -E (pro le
parolas non indicar genere grammatical). E assi, parolas que in
portugese, espaniol e italiano ancora habe un final con -O, -A ha
simplemente perdite ille vocal.

AVAR. CAR. CLAR. AMAR. HUMAN. SOL. Es multo estranie audir iste e altere
adjectivos sin un vocal final. Io senti le manco mesmo de un -E (si illo
non causarea alteration phonetic): AVÁRE, CÁRE, CLÁRE, AMÁRE, HUMÁNE,
SÓLE, etc.

Io justo ora pensava a adjectivos formate con -AMENTE tamben ab iste
parolas, sequente le patrono del adjectivos con -C: AVARAMENTE,
CARAMENTE, CLARAMENTE, AMARAMENTE, HUMANAMENTE, SOLAMENTE... istos serea
multo plus recognoscibile al parlante del linguas neolatin. Multos
esserea mesmo identic al parolas original.

Attention! Isto NON del toto es un suggestion de alterationes a
Interlingua!

Iste littera tracta solmente de alicun cosas que passava a mi capite,
super como io "senti" alicun aspectos de Interlingua, e io pensava que
forsan alicunos se interessarea pro isto.

Allegra!
--
   ENSJO*: EMERSON JOSÉ SILVEIRA DA COSTA
  E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
 UIN ICQ : 713833   [* "sj" pronunciate "sh"]

INTERLINGUA - lingua auxiliar international
    Info : http://www.interlingua.com
 Grammar : http://www.nautilus.com.br/~ensjo/interlingua/english.html