Car amicas e amicos de INTERLNG
Gratias a Frank Pfaff, io es nunc in contacto con vostre lista. Mi adresse
electronic es a mi labor, e quando le schola ubi io labora aperiva de novo su
portas, lunedi 18 de augusto, io discoperiva que 176 messages me attendeva !
Martedi io habeva 28 messages veniente solmente de vos e hodie, post duo dies de
absentia, io habeva le placer de leger de novo litteras in Interlingua e in
multo bon humor !
Super le problema de parlatores native in Interlingua, io pote adjunger que io
vide nulle ration de parlar in Interlingua con su proprie infantes quando on es
al casa ! Durante le conferentia a Strasbourg, io sempre parlava con mi filias
in Interlingua, ma nunc, isto esserea un nonsenso in mi opinion, illas debe
parlar francese anque !
Parlar de mi filias me rememora un importante parte del conferentia que forsan
Frank non ha realisate. Il habeva circum 10 juvenes qui habeva inter 17 e 25
annos, veniente de Bulgaria, Francia, Romania, Russia, Ukraina, Hollanda. Illes
DEBEVA usar Interlingua pro communicar. Pro mi filias esseva le prime vice que
illas non poteva "refugiar se" detra le francese, lo que illas faceva sovente in
le precedente conferentias, ubi plure participantes qui ama tropo le francese (e
plus generalmente le linguas estranie) parlava francese con illas in loco de
Interlingua !
Plure juvenes me diceva que a iste conferentia, illes ha vermente incontrate
altere juvenes con le qual illes ha potite excambiar ideas in Interlingua, sin
parlar de problemas linguistic que generalmente non es lor principal
preoccupation. Illes ha trovate que il esseva difficile de haber contactos con
alicun del participantes minus juvene. Illes habeva timor de non parlar ben, un
poco anque le sentimento de disturbar personas tropo importante pro perder
tempore con iste juvenes qui sembla minus seriose !
Tamen, io pensa que le ver fortia de Interlingua, su ver futuro es in iste
participantes (plus o minus juvene) que vole excambiar ideas, qui se interessa
al alteres pro saper como illes vive, pro parlar de lor problemas, ma anque pro
facer le festa con illes ! Si Interlingua debe devenir un lingua de labor pro un
qualcunque institution international, illo debe probar su habilitate a esser
usate in le conversation de cata die. Io sape Frank que tu ha sentite iste
"habilitate" de Interlingua durante le conferentia, ma io non es secur que tu
habeva sentite le mal esser (leve felicemente !) de alicun juvenes tropo timide
pro osar parlar con participantes tropo seriose.
Io sape anque que timiditate non es le apanage del juventute e que pro nos minus
juvene es a vices difficile de haber le coragio de "abordar" un persona
incognite. Le cosas es forsan plus simple inter juvenes qui non ha iste
barrieras supplementari que nos (io !) apprendeva in nostre manual del
"saper-viver" (traduction litteral del parola francese pro un institution que ha
bon lateres ma pote anque devenir un ver carcan).
Totevia, io vole regratiar Leland Yeager qui parlava con mi filias con grande
simplicitate e lor dava un poco de fidentia in lor possibilitates de parlar in
Interlingua con participantes de plus que 25 annos ! gratias Leland del parte de
Gaelle e Frederique.
Io non pensa haber sovente le tempore de scriber como hodie, ma io prendera
sempre le tempore de leger vostre correspondantia ubi io trova cosas seriose (o
minus seriose) super questiones linguistic e anque narrationes, poemas,
excambios de ideas amusante, quasi le atmosphera de un bon conferentia ! ma non
face me dicer que un "conferentia electronic" potera reimplaciar un conferentia
como isto de Strasbourg, Prague, Borne ...!
Amicalmente
Alix
|========================================================================|
| Alix POTET |
| ---------- |
| E.C.N | tel: (33) 02.40.37.16.28 |
| B.P. 92101 | fax: (33) 02.40.74.74.06 |
| 44321 NANTES cedex 03 | e-mail: [log in to unmask] |
| FRANCE | |
|========================================================================|
|
