Piet, Mi diploma baccalaureate al universitate esseva in le biologia, e io ha habite cursos in le taxonomia (le classification de animales e plantas). Io opina que le usage de nomines "popular" non es le mesme como le nomines scientific (Linnaeus). Le prime nomine es le nomine del genere e es un categoria superordinate sub mesmo plus general categorias como le familia, le ordine, le classe, le phylo e le regno. Le secunde nomine in le par es, como vos diceva, le specie. Sovente nomines popular pro animales o plantas es un parola, e illes pote referer non solmente a un specie, mais a plure specie, e mesmo organismos de differente familias. Per exemplo, le species Acrocephalus arundinaceus e A. schoenobaenus es ambe nominate in anglese "warbler". Mais il ha altere species in altere generes in le familia Sylviinae (Lat. sylva = silva) que es equalmente "warblers" (specificamente le familia de "Old World warblers", i.e. le "warblers" del hemisphere oriental. In iste familia es equalmente p.e. Hippolais polyglotta (melodious warbler), Sylvia atricapilla (Blackcap), Locustella naevia (Grasshopper warbler), etc. 339 species. (Istos es parve aves del silva). Il non ha alcun nomines "international" pro "warbler" trans le linguas a base. Mais le italiano ha "silvia" pro "warbler", e isto corresponde quasi al nomine del familia (non justo le genere). Io considerea iste nomine como un possibilitate pro iste gruppo de aves. Le nomines scientific a vices es basate super le location, le comportamento del organismo, certe characteristicas prominente de su anatomia, e mesmo le nomine del homine qui ha describite lo, o le nomine de alcuno qui le scientista voleva honorar per dar lor nomine al specie. Mi patre dava le nomine de mi matre "Dorothea" a plure specie de arthropodas. (Ille esseva un biologo, specialista in le arthropodos non insectal, specialmente le arachnidas). Sovente le distinction inter genere es non facilemente visibile sin accurate observation. Assi le classificationes popular es sovente al nivello superordinate, p.e. le familia, que se basa super plus obvie characteristicas. A vices le nomines scientific es pur hasardo. Un zoologo qui nominava le "Kookaburra" (le asino ridente--non un asino de toto mais un ave in le familia de martines piscatore que habeva un crita como un asino ridente) voleva un nomine generic distincte del altere martines piscatores, qui habeva le genere Alcedo (le parola latino pro iste gruppo). Ille simplemente creava le nomine "Dacelo" como un anagramma de Alcedo, pro le genere del Kookaburra. Isto es un facto interessante de iste libro. Quando le europeos veniva al hemisphero occidental, illes discoperiva animales e plantas que esseva similar mais equalmente differente que aquellos in Europa. Totevia illes usava le nomines de animales, aves, e plantas similar in Europa pro le correspondente organismos in le Americas. A vices istos non esseva mesmo in le mesme familia como in Europa. De plus le anglese, francese, e espanioles mesme habeva differente nomines pro le mesme animal in Europa, e non semper variantes de un prototypo. Le problema de crear nomines pro le milles de animales, plantas e aves, etc. va esser multo difficile. Ben que le nomine scientific es international, illo non es un nomine familiar a homines ordinari. A vices illo es troppo "specific" ubi le homine ordinari usa un nomine mesmo plus general, al nivello de un familia. De interesse, e possibilemente de adjuta, es un nove libro que io ha comprate del "Bibliotheca de Scientia" (un club subscriptive pro comprar libros de interesse general a scientistas e studentes del scientia popular): A. F. Gotch. (1996). _Latin Names Explained: A guide to the scientific classification of reptiles, birds & mammals_. New York: Facts on File, Inc.. Il dice que "Libros de Facts on File es disponibile a precios reducite quando comprate in grande quantitates pro commercios, associationes, institutiones o promotiones de venditores." Possibilemente vos va trovar lo a un bon precio, mesmo in Europa. (Le libro esseva imprimite in Grande Brittania". Io non intendeva a studiar le problema de nomines de organismos biologic in interlingua, mais io pensava per le titulo que isto esseva solmente super nomines in general, e non nomines scientific. Nonobstante illo solmente pertine a aves, mammales e reptiles. Stan Mulaik