Victor, Io accepta vostre patriotismo como bon, justo como io similarmente accepta le patriotismo de Allan. Allan es de un parve (mais importante) pais que Russia habeva invadite al comenciamento del Guerra Mundial II, e le finnese esseva capace de defender se, ben que illes esseva fortiate a causa de lor location a prender positiones neutre in le conflicto inter le Union Sovietic e le Occidente. Allan, il me pare se identifica con un parve populo qui vole lor independentia, pro que in certe respectos isto es le mesme con su proprie pais con respecto a Russia. Io non es certe que le situation es exactemente le mesme inter Finnlandia e Tchechnia. Finnlandia non es in le interior de Russia. De facto il ha pauc paises que es in le interior de altere paises. Certemente quando isto existe, il es importante pro le pais in le interior a facer bon relationes con le pais que lo contine, como Switza in Europa. Russia es un grande pais con multe culturas, que face difficile le integration de un tal pais in un societate. Io opina que in le occidente le politicos al sinistre currentemente ha ideales que diversitate es auree sin realmente appreciar le problemas que isto crea. Un pais exige un cultura que face emphase de certe valores commun a tote le cititanos sin respecto a religion, racia, o ethnicitate. Mais durante que in le occidente on lauda le diversitate, on rejice cosas que in le passato ha servite a unir un populo - un lingua commun, un religion commun, un stylo de vita commun, qualcunque - como intolerante del diversitate. On justo debe acceptar le diversitate e ignorar lo que es commun. Mais diversitate ha su problemas, e il es multo difficile a resolver los si on non vole recognoscer los, specialmente si le differente partes non vole trovar un terra commun super que a haber relationes pacific con lor vicinos. Io non crede que le populo de Russia o de Tchechnia ora ha un conception commun super le qual illes pote viver con le un le altere. Il es irrealistic a creder que tote le mundo pote seder a un tabulo de conferentia e trovar solutiones mutual a iste puncto. A vices le guerra es le sol resolution de un conflicto. Il es un horribile medio de resolver problemas. E possibilemente le participantes in le conflicto debe experientiar le horribilessa del guerra a decider que isto es un mal medio de resolver le conflicto e esser preste de facer compromissos. O un latere va vincer. Mi pais habeva su conflicto interne un cento e quaranta annos retro, le guerra civil. Un guerra horribile! Como tote guerra, cata latere habeva certe irrealistic expectationes. Lor ideas de guerra esseva naive. Un general ha dicite "Nos debe facer le guerra tante horrible como possibile tal que le populo va odiar lo e rejicer lo como un option". Ben, le Nord vinceva. Isto non ha resolvite tote le problemas, mais le fortias de unification esseva capace de inserer se in le situation. Cata generation debe travaliar pro regenerar le fortias de unification e pace. Io es a ver dicer neutre con respecto a vostre guerra. Io opina que ambe partitos ha certe irrealistic expectationes a venir del guerra. Russia possibilemente va trovar que le Tchechnianos es tanto resolvite como le russos esseva a Leningrad contra le germanos. Le Tchechnianos va trovar que lor pais es destruite, e lor homines occidite. Qualcunque es le resultato, le duo partitos debe, post le guerra, trovar alcun via a viver con le un le altere. Possibilemente il va haber solmente un victoria pyrrhic, pro qualcunque latere. Con respecto a Turchia in le Union Europee, io opina que isto es possibilemente un error. Le Turchia es un societate moslem sub un governamento militar que supprime le cultura moslem. Isto es un cultura estranie al cultura del majoritate de paises de Europa. In le Union on non va tolerar un governamento suppressive in Turchia. Alora tote le fortias moslem va reasserer se in le nove libertate, e conflictos va sublevar se. Il va haber sectores del societate qui vole quitar le Union. Possibilemente le politicos in le Occidente non moverea pro absorber Turchia si il non ha lineas de tubos de petroleo que passa per Turchia a Europa. Si Germania ha problemas in reabsorber su fratres al est, qui ha formate un differente cultura in 45 annos de separation, le Union Europee va haber multo plus problemas in absorber Turchia, que non jammais esseva un pais europee. Le differentias in lingua, religion, familia, comportamento, etc. es troppo grande. Mais io lassa iste question al europeos mesme a resolver. Io spera que le populo actualmente face le decision e non alcun pauc politicos qui opera independentemente del voler del populo. Stan Mulaik