Circa 350.000 casas in le region metropolitan de Atlanta, Georgia, SUA, es sin currente electric hodie post un major tempesta de pluvia a temperaturas gelante ha passate per le region. Le resultato esseva le arbores cadite que ha rumpite lineas electric in multe locos in le citate. Le stratas mesme es passabile, proque le temperatura del terra al superfacie es ancora supra le puncto de gelar. Mais le arbores ha devenite gelate tal que le pluvia que cade super illos gela a glacie, que pone extra peso super le arbore. Il ha multe pinos in le area, e istos es multo susceptibile a cader in tempestas de pluvia gelante. Totevia, multe arbores decidue ha equalmente cadite. Le television monstrava un grande querco rubie de etate de 80 annos, que cadeva trans un strata in un vicinitate de vetere mais grande casas. Le arbore tanto ben cadeva super un Mercedes-Benz de fabrication recente. Isto esseva un grande arbore! Illo habeva multo peso. Quando illo cadeva le trottoir de cemento circa lo ha venite a alto con radices del arbore. Mi filio Roberto in Canton, Georgia nos telephonava a 06.30 iste matino a dicer que illes esseva sin currente electric. Eventualmente ille habeva facite un foco in su camino, e su sposa diceva que lor furno de cocina esseva de gas, e illes poteva incendiar los con flammiferos, malgrado le facto que sovente illes usa le currente electric a incendiar lo initialmente. Mi altere filio, Stephen in Smyrna, que es inter nos in Marietta e Atlanta, telephonava que ille equalmente esseva sin currente electric. Mais il habeva alcun excitation in su vicinitate quando ille discoperiva que un casa trans le strata de su casa se combureva. Multe fumos veniva del casa. Ille curreva trans le strata a notificar le vicinos in le casa, duo medicos de India e lor filio, que lor casa se combureva. Alora ille telephonava le corpore de pumperos. Illes finalmente extingueva le foco, mais il habeva multe fumos, e certe partes esseva destruite. Il va requirer plure menses a reparar lo. Lo que esseva fortunate esseva que le matre e patre de un del par de medicos esseva in India pro un visita con familia, e le parte del casa ubi illes habitava esseva un parte que esseva principalmente comburite. Isto es un casa multo grande. De plus mi filio Stephen peteva nos si su familia pote junger nos, proque nos ancora ha le currente electric e le calor. Assi nos les expecta plus tarde hodie. Al momento con tote le pumperos e lor cammiones, il es troppo difficile pro partir de lor vicinitate. Stan Mulaik