Ci un selection ex un plus longe articulo in le New York Times: ------- Juvenes aurate trova pena in le mundo de travalio Pro le proles del classe de otio actual, le empleos real es troppo ennoiante. per Monique Yazigi New York Times Service, New York Le comenciar in le programma de formation de cadres al Chase Manhattan Bank in New York non se developava del maniera que le habitante de 29 annos del Upper East Side [quartiero ric de New York] habeva attendite. Durante le cinque annos post que illa se graduava del universitate, su familia la habeva sustenite in Manhattan, e illa habeva passate su tempore como organisator voluntari de soirees pro associationes caritative. Ma subito, inter su amicos, il non esseva ancora acceptabile pro juvene adultos a non travaliar. Tote le princessas scintillante de Park Avenue se fanfaronnava de lor grave empleos de jornata. Il esseva chic haber un carriera. Le juvena demandava de su patre, un financiero notabile, a adjutar la trovar un empleo. Papa, como illa le appella, parlava con amicos de golf al country-club Round Hill in Greenwich (Connecticut), e intra duo septimanas illa se trovava in le banco. Le chichessa durava mal. Quando illa comenciava, marte 1998, superiores la informava del regulas vestitori: Reimplacia celle gonnellas bouffate de Agnes B. e scarpas platte de Chanel per habitos obscur e scarpas de travalio classic con calces a 2.5cm, e porta calcettas. Illa obsequeva, benque illa trovava calcettas "typic del moda del medie classe". On la moneva a restringer le uso personal del telephono, e dunque illa faceva su arrangiamentos de partita foras le horas de travalio. Illa obsequeva los que illa appella le regulas "stupide" del banco, ma alora le estate se approximava, e illa informava su chef que su familia sole prender un feria de tres menses in le sud de Francia. On la diceva que on la permitteva un septimana libere. "Un sol septimana?" diceva le femina, cuje timor de ludification la duceva a demandar de restar anonyme. "Isto esseva tanto ridicule. Illo non suffice mesmo pro facer le comprares." Quando illa retornava al bureau, medie septembre, illa trovava que - necun surprisa - illa esseva sin empleo. "Le tote experientia esseva un choc", le femina diceva. "Io nunquam habeva essite presso de tanto multe personas del medie classe, toto in le mesme camera. Il esseva horribile. Illes esseva cruel e jelose, e expectava me perder toto nostre amusamento de familia." ------ Amicalmente, Chris Burd Victoria, Columbia Britannic