Amicos! Io retorna al bureau post le "feriato prolongate" de Carneval: desde sabbato usque a medie-die de hodie. Intertanto io non ha accessate le Internet, e ora io ha plure messages nove a leger. In iste Carneval, le thema le plus exploitate per le Scholas de Samba in le concursos de Rio de Janeiro e São Paulo (le plus importantes, ma non le uniches!) ha essite le commemoration del 500 annos del discoperta de Brasil per le portugeses in 22 de april de 1500. Le vestimentos e le "carros alegoric" recordava le expansionismo portugese in le fin del 15te seculo, le cerca del cammino maritime verso le "Indias" per le circumnavigation le costa african, e le disviamento de navigation que ha ducite le flotta de Pedro Álvares Cabral a west, usque a trovar un nove terra. (Alcunos attribue iste disviamento al absentia de ventos, que haberea lassate le naves al mercede del movimentos maritime. Alteres defende le theoria que le portugeses ja suspiceva del presentia de terra a west de Africa, e illes ha profitate del opportunitate pro investigar.) Alora il habeva allusiones al beltate del nove terra, le periodo colonial, le independentia, le monarchia, le instauration del republica, e altere eventos del historia brasilian. Alcunes minus felice, como le colpo militar de 1964, le censura e le tortura de dissidentes; e alteres plus amen, como le restauration del democratia. Ma tote iste cosas del Scholas de Samba es un parada, solmente un del cosas que eveni durante le Carneval. Le populo participa plus activemente in ballos e multe altere manifestationes cultural secundo le region de Brasil. E tamben per accompaniar le assi-nominate "trios electric": camiones apparatate con grande amplificatores sonor, super le quales bandas de musica se presenta, que percurre le stratas del citates. Un grande multitude de gente los seque, dansante e bibente bira, per horas sin cessar. Tote iste "follia" se extende durante tote le dies (e noctes!) del Carneval. Hodie, ante venir al travalio, io videva le television. Un representante del Ecclesia Catholic (le principal religion in Brasil) diceva que ja desde le zero hora de iste mercuridi se initia le periodo del Quaresima, e le christianos deberea adoptar comportamentos plus "pie", como observar le jejuno. Totevia, multe "folliones" de Carneval, specialmente in le region nord-est de Brasil, voleva profitar de plus iste die pro facer festa. :^) Ben, non me include in tote iste "follia". Io es troppo domestic, e non ha participate de un festa al minus. Io ha profitate del occasion pro visitar mi matre -- qui se senti "abandonate" post mi matrimonio :^) -- e jocar "War II" (un joco de tabuliero de guerra) con alcun cosinos. Ben, io ora es de retorno. A revider! Ensjo.