Como in annos passato, io ha describite in april como circa le citate de Atlanta il ha tornados. De novo il ha le mesme cosa. Heri nocte un tornado passava per le contato al nord del mie in que mi filio habita. Illo passava al est per tres contatos, inflictente damnos in cata un. In le contato de Cherokee ubi mi filio habita, illo passava solmente un kilometro del casa del patre affin de mi filio, destruente un belle casa. Plus lontan le tornada passava per un subdivision de multe casas. Il habeva circa 60 casas malmente damnificate. Fortunatemente necuno esseva occidite. Hodie nocte le resto de un grande tempesta de que le tempesta del nocte passate esseva solmente un parte, ha arrivate in nostre region circa Atlanta a circa 1900 horas. Le sirenas habeva alarmate, e io e mi sposa habeva currite al basamento al camera ubi io ha mi computator. Nos habeva duo muros inter nos e le exterior del parte posterior del casa. Al fronte, nos ha un muro detra le que es terra. Le posterior de nostre casa es super un collina, al basso de que es un parve fluvio. In certe respectos io voleva que io habeva un plen basamento con terra a tote lateres. Mais isto es le melio que io pote haber contra le tornados - que pote destruer un casa integre. Le television ha monstrate le damnification del casas del nocte passate. Con tornaodos il es semper un curiositate que un casa pote esser destruite totalmente durante que al latere de illo sta un altere casa que recipe necun damnification. Con le sirenas, io pensava que isto es alquanto como le "blitz" in London del Guerra Mundial II. Fortunatemente nos ha nostre advertimentos, non solmente in le sirenas, mais in radios in nostre casas que recipe transmissiones del servicio meteorologic, includente special advertimentos que causa un alarma a sonar. E le stationes de television equalmente diffunde informationes super le tempestas e monstra le "radar doppler" que monstra le ventos e le motion de aere in le tempestas. Il es equalmente possibile a usar nostre computatores pro obtenir le resultatos de radar de rango longe que detege le tempestas e le pluvia in illos al largessa de duo o tres statos. Assi nos pote sequer le progresso de un major tempesta in su movimento de Mississippi a Alabama a nostre stato de Georgia. Isto provide bon advertimento. Totevia, si vostre casa es directemente in le tracia del tornado on solmente pote precar que vostre vita es sparniate. Mais io perde le somno. Le alarma nos evelava duo vices le nocte passate, le prime a 0110 e le secunde a 0305. Io non ha multo somno. Il ancora ha alcun partes del grande tempesta a nostre west, mais io spera que isto va passar ante multe horas. Io vole dormir ben hodie nocte. De mi refugio subterranee, io es Stan Mulaik