In Svedia on poteva desde le fin del 19-e seculo usque 1966 passar un examino que dava le derecto transir a un universitato. Iste examine se traduce in varie linguas como bacalaureato, examine de immatriculation, examine matural, matura. Le termine svedese es verbatim traducite "examine studentil". Viste que plure linguas usa le termino examine de maturitate ego pensa que _matura_ pote esser un bon rendition in interlingua. Le problema con traduction de tal terminos in un lingua einternaitonal es que varie paises ha varie systemas. In Svedia le matura primo era un examine de intrar in un universitate, sed gradualmente le matura migrava al gymnasio, le schola pre-universitari, schola intermediari (inter primari et universitari). In plure paises on parla del _schola seundari_ pro nostre "gymnasio", essente equal a un highschool del statos unite. Nota tamen que in multe paises un _schola superior_ es a nivello universitari! Post le anno 1966 le matura era abolite, et on nunc solmente fini le gymnasio. Le juventute tamen ha mantenite le traditiones del previe matura, et on ancora dice que on _passa le matura_ malgrado le facto que il non ha alcun matura de passar! Post iste longe preambulo (forsan inspirate del enormemente longe preambulos del textos official producite del bureaucrates del Union Europee, ego pote narrar que hodie il habeva multe juvenes qui "passava le matura". Le familias, le parentela (relationes) attende le maturistas ante le schola. Il ha devenite un tradition que on porta un placard con un pictura del abituriente in question como infante. Le pictura es un foto que on ha magnificate. Le plus artisticamente, le optime! Postea on scribe le nomine del persona per grandissime litteras. In le presente gymnasios svedese il ha diverse programmas (lineas, directiones) et le classes final era lassate foras del schola in ordine alphabetic secundo le nomine del programma! On spera et spera et proba trovar _su_ abituriente. In Svedia le maturistas porta un bonetto studentil (albe sur le vertice con visiera nigre "metallic"). Super le visiera curre un cinctura con varie colores, dependente del programma (linea). Nunc vos habe le pictura ante vos: Multo gente. Tempore calide, sol, celo blau, omnes cercante. Juvenes viagia in automobiles. Lo optime es si on viagia per un camion assi que on pote sider sur le planco de carga et viagiar (quasi como un soldato in un camion militar), sed ci il ha flores, on sona trompettas, on canta. Amicos, amitas, parentes, genitores, fratres, amicas, avunculos; totes es collegite et il es un die de grande gaudio. Et on da presentes (cadeaus). In le vespere on va festar, biber, dansar et gauder se... Et nos pote solo desirar a totes: Felice estate et multe successo in tu vita futur!