Le John Hancock de John Hancock Le Presidente del Secunde Congresso Continental (que se reuniva in Philadelphia in 1776), era John Hancock, le plus ric persona in Boston. In 1773 ille habeva ducite le Boston Tea Party, ("Partita The de Boston"), un action militante in le qual alcun colonistas se ha disguisate como Indianos e ha abbordate tres naves in Boston Harbor e jectate lor cargo de the in le mar pro protestar contra le impostos a the (un del mottos anti-britannic del revolutionarios era no taxation without representation, "nulle taxas sin representation"). Le 4 de julio, 1776, Hancock ha signate le Declaration de Independentia ab Britannia e su rege, George III. Si tu ha vidite iste documento, o un facsimile, tu ha vidite su nomine scripte supra le nomines del altere 54 signatores, plus grande que le altere signaturas (o le texto mesme) e dunque su nomine ha entrate in le idioma american--tu John Hancock es tu signatura . Al vice Hancock ha explicate que ille habeva scribite in litteras tanto grande "a fin que Corpulente George in London pote leger lo sin su berillos. ("so that Fat George in London can read it without his glasses." Le veritate re le Declaration de Independentia es que Hancock lo ha signate le 4 de julio, ma solmente ille. Le altere delegatos addeva lor nomines durante un periodo que extendeva a 1777 (le die in le qual le plus grande numero signava era le 2 de augusto). Nonobstante, le data in le texto imprimite es le 4 de julio, 1776, e illo es le data celebrate hodie como le initio del republica american. Ma in un littera de 3 julio, John Adams (qui, como Hancock, era un delegato de Massachussets al Congresso Continental, e qui depost ha devenite le prime vice-presidente e secunde presidente del nove nation—e qui anque era le patre del sexte presidente, John Quincy) ha scribite de Philadelphia a su sposa Abigail in Quincy, Massachussets que in le futuro le 3 de julio serea memorate como un grande die in le historia del libertate. Quanto al Boston Tea Party: pueras e pueros statounitese son inseniate que le colonistas qui favorava le independentia boycottava the pro protestar contra le imposto britannic, e finalmente ha jectate un cargo de the in le mar pro prevenir que le Tories (colonistas pro-britannic) lo biberea. Ma vermente le Whigs (colonistas anti-britannic) generalmente evitava le importation non per abstiner se de the ma per biber the contrabandate, que era minus car non solmente perque illo non era taxate ma etiam perque le British East India Company ("Compania Britannic de India del Est") habeva un monopolio de the legal. Ma perque le the que illo sperava vender al colonias american acccumulava in su magazines in London, le East India Company ha decidite que sia melior disrumper le boycott per abassar le precio tanto que, mesmo con le imposto addite, illo serea minus car que le contrabando. Ma le plus grande mercante de the contrabandate era John Hancock mesme, qui deveniva mesmo plus ric que ille habeva essite ante le boycott, un facto que monstra su participation in le Boston Tea Party in un vista differente del version heroic que es inseniate a alumnos american. Incidentalmente, io ha legite del conflicto de interesse de Hancock in le obra del scriptor britannic Robert Graves; le fontes american son inexplicabilemente reticente de isto! Hodie, minus de americanos sape que Hancock era un contrabandero de the quam sape que Joseph Kennedy (le patre del Presidente John Kennedy) era un rumrunner (contrabandero de alcohol) in le era de Prohibition. GENORUM TRACTATIO DELENDA EST