ethologia LE IMPERIALISMO DEL FORMICAS ARGENTIN Illos domina le mundo. Detectate poco plus que un decennio retro in le Statos Unite, le formicas argentin del specie _Linepithema humile_ ja se ha disseminate per le paises del Mediterraneo. Implacabile, le invasores expulsa le formicas native e controla vaste territorios. Pro isto, illos utiliza un strategia imperialista de facer invidia al plus habile general roman. Quando illos arriva a un territorio nove -- generalmente per accidente, in le silo de un nave -- le argentinas oblida le divergentias interne inter le colonias e deveni sorores armate. Durante que in lor terra natal le clans de insectos sole luctar inter se tote le tempore, in le estraniero illos forma ver megacolonias, que pote esser mobilizate a qualcunque momento in le disputa pro alimento. "Le animales non se attacca mutuemente perque illos es totes parentes proxime, descendente del prime colonizatores", ha dicite le ecologo Neil Tsutsui, del Universitate de San Diego, qui ha publicate un studio super le imperialismo del argentinas. Ma a longe termino le fato del strategia es le fiasco. Sin differentiation de parentato, le megacolonia cessa evolver, e curre le risco de degenerar se. ### [Pro combatter le plaga del formicas argentin, le recercatores suggere portar nove lineages del specie al areas affectate. Isto pote facer retornar le vetule discordias, instabilizante le megacolonias.] ~~~ genetica IRLANDESES HA GEN DEL ETATE DEL PETRA Le irlandeses ha ration in sentir se differente del britannicos. Un stidio genetic ha monstrate que illes es plus proxime al bascos que al angleses. Le habitantes de Irlanda ha in lor ADN un gen que quasi non existe in le resto de Europa. Cognite como haplotypo 15, aquelle gen era characteristic del populationes europee in le Paleolithico. Illo ha disparite del continente gradualmente a partir del migrationes del populos agricultor del Medie Oriente, circa 5.000 annos retro. Ma in Connaugh, in le puncta nord-west de Irlanda, illo appare in 98% del homines. Un frequentia similar solo existe in le Pais Basc -- region in le nord de Espania cuje habitantes tamben se considera un racia a parte. "Tanto le bascos como le irlandeses ha restate isolate de aquelle undas migratori", ha dicite le biologo Daniel Bradley, del Trinity College, de Dublin, un del autores del recerca. ### ~~~ Traducite de Revista SUPERINTERESSANTE, anno 14, nš 7, julio 2000 Interlingua--English Dictionary: http://www.interlingua.com/ Ensjo.