Secundo plure articulos in periodicos statosunitese scholas e universitates in le Statos Unite cerca pro inseniantes e scientistas in paises extrannee. In le departamento del chimia al Universitate Emory in Atlanta, Georgia SUA Nikolai Ivanov studia pro un diploma postgraduate in le biochimia. In le mesme departamento, duo nivellos plus basse, Andrei Ivanov conduce le recerca biologic, e recipe multe litteras adressate a Nikolai. Isto es commun, specialmente in Russia, ubi le nomine "Ivanov" es un nomine commun. "Io veniva aqui proque isto es ubi mi amicos esseva," diceva Nikolai, 26, referente a su octe cameradas studentes del Superior Collegia Chimic de Moscow qui ora recerca le chimia al Universitate Emory. Al fin de augusto le Universitate Emory conduceva un orientation pro plus que 200 alteros similar a illes - studentes de tote le partes del mundo, le majoritate de que es studentes postgraduate preste de plenar un vacuo aqui pro le recerca in le scientia. Similar orientationes esseva conducite a Georgia Tech e le Universitate Statal de Georgia in Atlanta. Durante que studentes statosunitese selectiona professiones como le lege e le commercio, departamentos scientific aqui torna de plus in plus a applicantes extrannee. Selectionante collegias american secundo le rangos postate in le Web e de guidas a collegias, iste studentes se applica a campos statosunitese sin vider los e veni con lor proprie moneta, o vive per bursas. Le plus grande numero veni de China, alora de paises como India, Sud Corea, Germania e Russia. "Insufficiente numeros de americanos recipe diplomas postgraduate in scientia," dice Terry Eiesland, associate director pro programmas de studentes e bursas international a Universitate Emory. "Il es impossibile pro nos a trovar le gentes nos exige pro mantener le programmas scientific si nos non cerca foras nostre bordos". Secundo statisticas governamental, plus que un medie de tote le studentes doctoral in departamentos american del scientia de computatores e del ingenieria veni de altere paises. A Georgia Tech, aquelle percento cresce a 62%. Plus que un tertie del candidatos pro diplomas doctoral in le Statos Unite es de paises foras le Statos Unite. In Georgia, approximatemente 1600 extraneeros qui jam ha lor diplomas doctoral es recercatores temporari universitari e professores, e circa duo terties de illes es in le scientias. Pot'esser milles de scholares temporari ha succedite in attinger residentia permanente o mesme derectos de citatanos. Le plus alte salarias in le universitates statosunitese es in le scientias. Un nove professor del literatura anglese va reciper un salaria, typicamente, de $30.000 durante que in scientias como le chimia, $70.000 es le salaria initial de un nove professor. Mais salarias es mesmo plus alte in le mundo commercial, e scientistas statosunitese selectiona positiones in commericio in loco del academia. Assi pro scientistas extranee un position academic in le SUA in un universitate pote esser multo lucrative in comparation con opportunitates in lor proprie paises. Totevia, le cammino a successo in un position academic in le Statos Unite non es facile. Un studente diceva que le plus difficile parte de venir aqui es justo a venir aqui. De plus, quando illes arriva in le Statos Unite, scientistas extranee incontra nove difficultates. Illes experientia le mal de nostalgia pro lor familias, e choc cultural, e mesmo le prejudicio. Le majoritate dice que illes vide lor familias solmente un vice per anno e minus. In addition, on debe apprender como a conducer se per le varie bureaucratias e apprender le attitudes e costumes cultural. A vices le attitudes es mal. Un biologo de Dehli, Joshi Harish, diceva que pro apprender le cultura american ille frequentemente vadeva a stationes de cammiones. "Alla," ille diceva, "un typo me sasiva per le collo e diceva 'Vos 'gooks' veni aqui e prender nostre empleos!" Joshi stoppava ille immediatemente per dicer "Bon! Si vos pote facer lo que io face, alora vos pote haber mi empleo". Finalmente, le majoritate de scientistas extranee dice que le major problema esseva a apprender anglese. Le communication es le essentia de scientia - le discussion de projectos de recerca e le presentation de papiros a conferentias, e le leger de articulos in jornales scientific. Si on non pote conversar in anglese, illes non pote communicar super le scientia. Mais isto non ha impediva le empleo de nove scientistas extranee in departamentos de Georgia Tech. Le collegia del ingenieria electric empleava sex nove facultate iste anno passate, duo de Iran, duo de China, e de India. Similar problemas existe in le Scholas Public. Le Contato de Dekalb in le region metropolitan de Atlanta recentemente empleava plure inseniantes de Germania. In le estate passate le contato de Cobb, un altere contato del region metropolitan de Atlanta, empleava juvene feminas svedese como guardas de corpore a piscinas recreational, proque juvene americanos non se interessa in tal positiones. E multe inseniantes statosunitese quita lor positiones a causa del multe frustrationes in lor empleos, pro assumer positiones plus lucrative in le mundo del commercio. Le bon economia jam cerca plus empleatos, e va pagar bon salarias melior que antea. --Stan Mulaik