A proposito le message de Stan ego pote narrar que il es le mesme situation ci in Svedia. On ha pro exemplo vocate plure expertos de computatores de paises como India. Pro un indio (non un "amerindio") ordinari il es quasi impossibile intrar in Svedia si ille non ha muuuuuuuulto forte connectiones familial in le pais. In Germania on vole advocar 30.000 indios pro travaliar in le interprisas computatorial. Un interessante cosa es que governamento ha facite un proposition de un lege secundo le qual expertos estranier potera laborar in Svedia con un privilegio fiscal que significara que illes non debera pagar le mesme taxas que altere mortales. Ego non es certe que ille lege jam ha passate le parlamento, ma on lo ha discutite in le medios. In le articulo que Stan cita on dice anque que le problema de adaptation cultural es difficile pro le recercatores estranier. Ego pote ben comprender isto, proque il es - alminus in mi experientia - un totalmente altere cosa cognoscer le anglese ben in Svedia et in Anglaterra. Nos ha un pictura de que es le cultura statounitese in le television, ma ego es convincite que le differentias quotidian pote esser stupende. Quando mi filia viagiava a un excambio de studentes gymniasial/highschoolial al Statos ego la accompaniava a un incontro de information que era multo interessante. Le juvenes era instruite attentar que on debe surrider per tote le bucca e reguardar le persona al qual on parla rectemente in le visage (que on non sempre face ci in Svedia*) e que "Nice talking to you" in facto solo significa "A deman!" Ego comprende ben, post mi tres annos in Polonia, que cata pais ha su manieras particular de esser socialdemocrata, amico al animales, vegetariano o humano pie. Il es melior que on proba apprender los, si on intende viver in le pais un plus longe tempore. Ma in le realitate isto es cosas que on apprende multo rapido. Il non ha dubitas que le mesme cosa vale pro le Statos Unite o Svedia etc. Ego ha le impression que le situation concernente le election de professiones es le mesme in Svedia - le estranieros essera ingenieros o techicos, durante que le nativos (nascite in le pais) occupara le profesisones de economista, advocato, instructor etc. Il es anque un facto que on es multo plus svedese in le estraniero quam in le proprie pais. Svedeses al extero observa omne le festas national, le yul (Natal), le pascha, le solstitio estival, le medieestate, le mangiar del canceres fluviatil (o surrogatos in le plus frequente casos, canceres de China o de Luisiana, USA), le premiera del haringos fermentate (un delicatessa que anque multe de mi amicos estranier ama post haber passate le limine olfactori. (Le non-iinitiato pensa que isto es pisces putriente). In Thailandia il ha un simile cosa. Il sembla esser pisces in ris que ha state in fermentation durante un septimana (in le climato thailandese isto debe esser multo efficace!) e isto custa ben, quando on - como dicite - ha passate le limen olfactori. Ma retro al thema, ci in Svedia ego non multe me interessa de omne iste cosas, ma illos sembla esser multo plus importante in un altere pais. On pote como exiliato haber le profito del festas in ambe paises. Amicalmente Cellus