Ci in America del nord, il ha multe equipas professional de baseball.
Alcunos son in le "ligas minor", que ha equipas in varie urbes minor,
ma le melior equipas, baseate in le plus grande citates, son in le duo
"ligas major,"  le Liga American e le Liga National (nonobstante le
nomines, cata liga include e equipas statounitese e equipos canadian).
Cata octobre, al fin del anno de baseball, le campion del Liga American
e le campion del Liga National joca in le "World Series" [Serie Mundial]
pro decider qual sera le campion del anno.

Iste anno, le equipa del Liga National in le World Series sera le New
York Mets. Iste nocte, le ultime joco pro decider le campion del Liga
American sera jocate inter le New York Yankees e le Seattle Mariners.

Io, personalmente, non ha necun interesse in iste cosas, e in particular io
pensa que le chauvanismo del citates, cata un pro su equipo, non es bon.
Ma io nota que, si le Yankees son le campiones del Liga American, il
habera un "subway series" [serie de metro], inter duo equipas in le mesme
citate. Naturalmente, pro conservar le energia que serea guastate si le
equipas necessita vola inter le costas est e west del continente, iste sera
preferibile, e nos omne debe sperar que le Yankees gania iste nocte...