Io non cognosce multo super iste debattos inter certe leaders de UMI e certe esperantistas in Europa. Il esseva probabilemente in le interrete a alcun gruppo de novas. Io opina que le individuo in question al Instituto de Interlingua habeva le credo que ille servi le legato de Dr. Gode. Dr. Gode non credeva que interlingua es un lingua de un parve societate de adeptos, qui necessita convertir plus adherentes pro facer possibile le uso de lor lingua. Interlingua de plus non es un invention artificial. Illo es un phenomeno natural jam existente in le linguas major de Europa. Le UMI que es create pro promulgar su usage non debe esser un organization como le esperantistas qui tracta lor societate como un quasi religion que debe convertir alteros a illo, que il non debe exister altere que un lingua auxiliar international e mundial. Interlingua, como un constatation e standardization del vocabulario international in le linguas major europee, pote servir in le forma de un lingua in locos ubi illo da su usatores un certe avantage e uso practic. Il va haber locos ubi interlingua non es apte. Interlingua non es intendite a esser le lingua de tote le mundo. Assi, malgrado le facto que ille habeva iste credos super le natura de interlingua, ille ancora laborava in le formation de UMI e con alteros qui ha jungite se a UMI. Io crede que ille esseva capace de tolerar le facto que multo personas qui veniva a interlingua veniva de altere systemas como occidental e esperanto e ido. Illes comportava con illes frequentemente multe attitudines verso interlingua que previemente illes habeva verso esperanto o qualcunque lingua esseva le lingua de lor selection. Ille essayava a mollificar tal attitudines per facer emphase del natura real e objective de interlingua e minimizar le le idea que interlingua es un lingua de un parve societate que exige plus conversos a illo pro provider alteros con qui a usar le lingua. Que interlingua pote esser usate in contextos ubi extraneeros non habeva previe instruction in illo, es un uso de interlingua que usa le phenomeno real in le linguas europee - le vocabulario international. Io crede que le individuo al Instituto de Interlingua credeva in iste ideal mesmo plus que Dr. Gode, e ille videva le actiones de individuos in le gerentia de UMI in debattos con esperantistas agente justo como le esperantistas. Possibilemente ille credeva que a alcun die in le futuro il va haber un ric oncle qui va venir del alte classes de societate, e nos debe esser preparate, a monstrar nostre professionalismo, nostre serio in usar le lingua in real e professional activitates. Ille esseva horrificate per vider ordinari gentes usante interlingua e tractante lo como si illo es un altere esperanto. Le facto es que le ric oncle non ha apparite, e le numero de adherentes ha diminuite o crescite in etate. Mais le interrete e le web ha create nove possibilitates e nos ha crescite per via de lor uso. Il es un nove mundo con nove possibilitates. Stan Mulaik