d[010214] x[Allan Kiviaho] KivA-12D s[Svastica] [log in to unmask] Ferenc Jeszszensky - [log in to unmask] [log in to unmask] Car amicos e inimicos de bandieras! ---------------------------------------------------- Bandiera Finlandese - Nostre bandiera del cruce blau Suomalaisuuden Liitto - Association de Fennismo Svastica - Hakaristi - Hakkors - Hakenkreuz ??? ---------------------------------------------------- Le 2001-02-06 io inviava le canto "Siniristilippumme" (Nostre bandiera del cruce blau). Un multo pathetic presentation de nostre bandiera e iste canto es in le sito del "Suomalaisuuden Liitto" (Association de Fennismo), http://www.suomalaisuudenliitto.fi/liputus.htm Iste sito contene i.a. le leges finlandese re bandieras (lippulait) e le nomines del statos in francese pro application protocollaire. Vide etiam, si il vos place, le imposante prime pagina de Suomalaisuuden Liitto http://www.suomalaisuudenliitto.fi Suomalaisuuden Liitto era fundate le 1906-05-12, per initiation de Johannes Linnankoski (Un famose poeta). Iste 1906-05-12 era le 100e anniversario de Johan Vilhelm Snellman, un grande economista e un loyal subjecto del velikií knyaz (grande duce) de Finlandia, i.e. le imperator de Russia. "Le scopo del Suomalaisuuden Liitto es eveliar e reinfortiar le conscientia e attitude national e con omne medias promover le cultura finnese, specialmente le finnophone. Le mission del association es a cultivar le lingua finnese, solidaritate finnese e le singularitate de traditiones cultural, infortiar le voluntate de independentia e defensa e le attitudes democratic, avantiar le cooperation international in varie brancas de culturas spiritual e material e sustener connectiones a finneses qui vive al estraniero e a nationes fenno-ugric. Le objecto particular del association es transformar le svedese obligatori [1] a disciplina voluntari in le scholas finnophone de nostre pais. Disdigno del finnese e de finnophones in le communitates que ha un majoritate de svedophones e in communitates bilingual debe esser cessate. Etiam in Ahvenanmaa/Åland finnese debe esser recognoscite como un lingua equal con le svedese [2]. In le examinationes de admission a universitates le studentes finnophone debe esser facite equal con le svedophones [3]. Pro attinger de su objecto le association face activitates de recerca, information e publication, respice le cultura finlandese re bandieras e nomines de familia e arrangia seminarios e occasiones de lecturas, negotiationes, discussiones e altere occasiones similar. Pro education de bandieras le association recipe supporto statal. Le association vende bandieras e standardos producte in le vernacular fabricas de bandieras". - - - - - - - - - - - - - - - - - - - - - - - - - - - Commentarios: [1] Le imperator de Russia declarava solmente in 1866 que le finnese era equal con le svedese in le Grande Duchato de Finlandia. Durante le 1920's e 1930's on habeva altercationes furiose inter le studentes finno- e svedophone. Le fennomanos e.g. catranava le placas de strata svedese. Le aggression del Union Sovietic in 1939 finiva pro longe periodo iste altercationes linguistic. Solmente post le guerras finnese deveniva practicamente equal con le svedese. [2] Le ålandeses resolutemente oppone le finnese in su insula. Åland tentava jam in le 1920's connecter a Svedia. Finlandia respondeva con inviante truppos militar a iste insula e arrestante le duces de Åland. Le Liga de Nationes menaciava Finlandia con expulsion. He-he, mesmo parve nationes pote haber tendentias a imperialismo ... [3] Le studentes svedophone ha privilegias que face pro svedophones plus facile attinger placias in univer- sitates etc. -- Allan - - - - - - - - - - - - - - - - - - - - - - - - - - - Quando vos adocula le signo del Suomalaisuuden Liitto vos certemente remarca que le signo forma un svastica. Un svastica??? Le Suomalaisuuden Liitto es ultranational sed certemente nulle organisation nazista o fascista. Multes de su capites son personas eminente. Iste organisation es bastante periculose proque su actiones probabilemente accelera le morte del lingua svedese in Finlandia. Io crede que un vaste majoritate de finnos vole facer Finlandia monolingual etsi probabilemente le majoritate de personas con alte education vole haber un bilingual Finlandia. Io so del branca fraternal le prime finnophone in mi parentela sed mi matre era finnophone benque etiam illa parlava svedese bastante ben. Mi marita Brita-Lisa es svedophone e ille ha un pauc problemas con le finnese. Nostre filia (32 annos) es multo svedophone, su prime lingua es svedese, secunde anglese, tertie finnese e quarte francese. Nostre filio (29 annos) possede svedese e finnese ca. equalmente ben, etiam ille parla multo ben anglese e bastante ben germano. Interessantemente le quasimarita de nostre filio ab su proprie iniativo faceva se svedophone post que illa habeva 15 annos. Illo era sage si nunc illa labora con SAS, un compania de aerotransporta svedese (o pan-scandinave). Assi, nostre familia non es pro un Finlandia monolingual. --------------------------------------------------- Svastica - hakkors - hakaristi svedese e finlandese --------------------------------------------------- Il es possibile que le svastica celate in le symbolo del Suomalaisuuden Liitto es intentional. Mesmo in tal caso illo ha nulle a facer con le svastica nazista o fascista. Sed Finlandia habeva un svastica blau como su symbolo national in aviones militar e le carros armate durante 1918-44. Le historia del "svastica finlandese" es interessante. Le Fortia Aeree Finlandese (Suomen Ilmavoimat - Finnish Air Force [FAF]) era fundate le 1918-03-06 quando Erich von Rosen, un conte svedese, presentava al Armea Blanc finlandese, que faceva guerra de liberation contra le armea russe e un guerra civil contra le Guardia Rubie finlandese, un chassator francese del typo Morane-Saulnier L ("Thulin Parasol"). Le Fortia Aeree Finlandese es le tertie plus vetule fortia aeree ancora existente. Le signo del conte von Rosen era un svastica blau, un ancian symbolo del sol e Finlandia lo adopteva como su symbolo national. Vide: http://hkkk.fi/~yrjola/war/faf/hakaristi.html http://www.hkkk.fi/~yrjola/war/faf/thulin.html Pilotas svedese sub le svastica finlandese ------------------------------------------ Durante le Guerra Hibernal inter le Union Sovietic e Finlandia un flottilia de pilotas voluntari svedese era formate sub le nomine "Flygflottilj F19". Un parte de su aviones usava le svastica finlandese (adoptate ab conte svedese von Rosen). Vide: http://www.canit.se/%7Egriffon/aviation/text/f19.htm Victorias e perditas http://www.dalnet.se/~surfcity/swedish_aviators/swedes_finland.htm http://www.dalnet.se/~surfcity/sweden_f19.htm "Tree kronor och hakkors" (Tres coronas e svastica) Jan Årmann, un grande interlinguista e grande pilota ----------------------------------------------------- Vide: http://www.mil.fi/ruotuvaki/06_00/01.html Le prime avion del Fortia Aeree Finlandese con su svastica era affinate in Umeå, le citate de Janne. Ab Umeå le "Thulin D" volava a Vasa, le citate del stato major e general Mannerheim del Armea Blanc. Janne Årmann ha essite un pilota de reserve del Regal Fortia Aeree Svedese e etiam volate ab Umeå a Vasa (si io ha ration) sed non como un pilota militar sed faciente viages de travalio como un ingeniero forestal! Salutante Allan