Tracias “recente” del homines de
Neanderthal
Illes haberea convivite plus a longe con le homine de
*Cro-Magnon.
Le homines de Neanderthal haberea
convivite con nostre plus recente ancestres pro millennios. Isto lo affirma le
equipa de Fred Smith del Universitate del Illinois septentrional e Erik Trinkaus
del Universitate de Washington, qui ha analysate alicun cranios de
neanderthalianos proveniente ab le excavationes de Vindija (Croatia)
per un nove technica de datation que se serve del spectrometria de massa.
Secundo lor studios, le retrovamentos non serea plus antique que 28.000 annos.
Se tracta del discoperta de fossiles neanderthalian plus recente nunquam facte
in le mundo e justo in le corde del Europa ubi le anthropologos les credeva
disparite al minus 5.000 annos antea.
Le retrovamentos previe faceva in effecto pensar que le neanderthalianos se haberea retirate al margine del continente como consequentia al lente colonisation del Europa central per parte del plus moderne homine de Cro-Magnon, arrivate ab le Africa e ab le Medie Oriente. Le ultime zona le qual ha essite habitate per illes, il haberea essite le Espania, ubi on les reputava extincte ultra 30.000 annos retro.
Le analyse del retrovamentos,
demonstra que le neanderthalianos retrovate in Croatia habeva capites plus parve
e un fronte minus angulate in comparation a altere fossiles, possibile signo de
un convergentia con le population plus moderne. In addition, le discoperta in le
excavationes de utensile de osso particularmente sophisticate mitte in dubita
anque le exigue habilitates manual attribuite a iste population in comparation
al homine de Cro-Magnon.
Le retrovamentos poterea testimoniar sia un evolution parallel sia un mesticiage del duo populationes, hypothese que le recercatores opina multo probabile. Secundo Lawrence Strauss del Universitate del Nove Mexico, “ iste discoperta rende plus plausibile un fluxo inter le duo populationes e redesigna le scenario del disparition del neanderthalianos como alco in plus de un simplice colonisation”. Como consequentia de iste studios, le anthropologos poterea inde, esser costringite a revider le actual theorias concernente non sol le extinction del neanderthalianos ma etiam lor intelligentia e lor contribution de iste population al patrimonio genetic del homine moderne.
* Cro-Magnon es un localitate del Francia sud-occidental, in Burgundia; illo appertine al communa de Les Eyzies-de-Tayac. In le territorio de Cro-Magnon in le proximitate de un protection roccose, on ha essite retrovate in 1868 fragmentos skeletic human (alicun adultos e un feto) remontante al pleistoceno superior. Le localitate ha tunc date nomine al typo anthropologic plus tosto evolute “homine de Cro-Magnon” cuje appertine ille homines e multe alteres discoperite in ultra in varie localitates francese e italian (Grimaldi presso Ventimilia). Al homines de Cro-Magnon son attribuite le frescos parietal polychromatic in le grottas de Lascaux in Francia e de Altamira in Espania.
Luca Ghitti