Car amicos,
io ha retornate post mi viage in Valle de Aosta. Io ha visitate plure
vallatas del Parco National del Grande Paradiso, per
exemplo: Valgrisenche, Valle de Rhemes, Valsavarenche, Valle de
Cogne. Hillac io ha viste numerose capras del roccas, camoces e murmures in
un ambiente salvage e charmante.
In un parve village proxime al citate de Aosta io ha visitate le castello
de Sarre. Iste castello ha essite acquirite per le Region autonome de Valle
de Aosta e que lo ha trasformate in un museo.
Le castello era le demora estive del reges del regno de Pedemonte e de
Italia post le unification national de 1860, super toto lo que reguarda le reges
Vittorio Emanuele II, Umberto I e Vittorio Emanuele III. Illes lo
usava como base de comenciamento pro le chassa in lor immense reserva
natural que hodie ha devenite le actual parco del Grande Paradiso. Il ha plure
photos e picturas de lor chassa al capra de roccas in le museo.
Le rege partiva con escorta de al minus un centena de personas:
soldatos, guardianos, guidas, homines del corte, habitantes del vallatas.
Le rege se campava in un confortabile cabana de montania e le
loco deveniva un ver campamento militar. Le matino ille montava a
cavallo e le escorta, a pede, cingeva le montania ubi il habeva
multe animales salvage. Al vespere post le chassa, multissime capras de
roccas e camoces abbattite se trovava al pedes del rege.
In le passato nostre monarchas non habeva securmente un politica del
ambiente e de protection del natura como nos lo ha hodie, illes usava le parco
solmente como reserva personal de chassa, solmente pro amusamento.
In le castello-museo de Sarre il ha cameras plen de cornos de capra de
roccas qua tropheo; centenas e centenas de iste cornos se monstra al passage del
touristas, un cosa vermente horripilante, de pessime gusto (pro me)!
Fortunatemente hodie multe personas in vice de chassar, photographa le
animales salvages in lor beltate natural e isto pro me es un ver
spectaculo!