Car amicos,
le proxime septimana io vadera in Valle de Aosta a incontrar mi oncle e mi
amita qui vive illac. Assi io restara foras del gruppo de novas dum alicun
dies.
Curiositates geographic e linguistic del Valle de Aosta:
- Le Valle de Aosta es le plus parve region italian, e le minus populate,
solmente 115.000 habitantes.
- Il ha le plus alte montanias del Alpes Occidental e Pennin: le Monte
Blanc: 4810 mt., le Monte Cervin/Matternhorn, le Monte Rosa, le Grande Paradiso,
ubi il ha vaste e grandiose glacieros.
- Il ha le Parco National del Grande Paradiso, le vetule reserva de
chassa del reges de Italia (le dynastia del Savoias) , e hodie illo es un zona
importante de fauna e de flora alpin. Io spera vider: cervos, capras del
roccas, camoces, murmures, aquilas.
- Aosta, le citate capital regional del Valle ha circa 40.000 habitantes e
ha essite colonia roman, fundate per Augusto in le 25 a. C. con le nomine di
Augusta Praetoria. Dum le XI seculo le citate habeva passate al Savoia usque al
1860 con le annexion al regno de Italia. Le citate ha un aspecto medieval, sed
le plus importante monumentos remonta al periodo roman: le circuito rectangular
del muros, con solide turres e le Porta Praetoria, le Arco de Augusto, le
splendide restos del theatro roman . Le bellissime ecclesia de Sancte Urso,
in vice, es de origine medieval (X seculo).
- Le Valle de Aosta es un region bilingue, on parla etiam le francese: le
Vallée de Aoste. Sed hodie pochissime personas son de lingua matre francese. Con
le massive immigration de italianos in le annos '50s e '60s le region ha essite
progressivemente italianisate. Le nomine del villages son totes in francese e
assi le indicationes stratal. le lingua francese es inseniate al schola primari
e le actos del administration public, le actos del tribunales, le leges del
assemblea regional son redigite etiam in francese.
- On parla etiam un patois franco-provensial, e in un parve valle lateral
(Valle de Gressoney) il ha un insula linguistic german. On parla un vetule
dialecto del populo del Walser de origine german qui ha venite in le alpes
circum le Monte Rosa dum le medievo.
Au revoir à la prochaine semaine!