LE AMERICANOS LABORA LE PLUS Secundo un articulo per Steven Greenhouse in le _New York Times_, un agentia del Nationes Unite ha reportate que americanos ha crescite le distantia inter lor position al testa e lo de Japon e tote le altere nationes industrializate in le numero de horas laborate cata anno. Le reporto promulgate per le Organization International pro Labor diceva que americanos ha addite proximemente un plen septimana a lor anno de labor durante le 1990s, ascendente a 1.978 horas al medie iste anno passate. Aquello es un crescimento de 36 horas--quasi un plen septimana de labor--depost 1990. Aquello equalmente significa que le americanos empleate passa lor tempore al labor circa 49,5 septimanas del anno. Le americanos labora 100 plus horas o 2,5 septimanas plus per anno que obreros japonese, 250 horas plus (circa 6 septimanas) que le obreros anglese, e 500 plus horas (12,5 septimanas) que obreros german, dice le reporto. Le japonese esseva originalmente al testa del lista de numero de horas laborate, mais in le medie del 1990s le Statos Unite ha superpassate Japon. Depost alora le Statos Unite ha crescite le distantia a su position in le testa. "Il es unique al americanos que illes continua a crescer lor numero de horas in labor, durante que le horas declina in altere nationes industrializate," diceva Lawrence Jeff Johnson, qui esseva le economista qui ha supervisate le preparation del reporto. "Illo concerne le psyche american, con le cultura american. Le obreros american es multo desiderose de facer le bon impression, a facer le maxime horas." Inter le rationes pro le grande distantia inter le Statos Unite e altere paises es que le europeos usualmente ha 4 a 6 septimas de vacantias cata anno, durante que le americanos usualmente ha solmente duo o tres septimanas. Durante que le empleatores american continualmente ha crescite le horas de extra labor durante le 1990s, in le Francia, le governamento ha reducite le official septimana de labor a 35 horas con le objecto de poner pression super companias a emplear plus obreros. Totevia, toto non es bon pro le americanos. Ellen Galinsky, qui es presidente del Instituto pro le Familia e le Labor, un gruppo noveyorkese que face le recerca, ha dicite que le grande numero de horas que le americanos labora pote resultar in obreros exhauste con decrescite productivitate. "Nostre productivitate es elevate proque nos labora plus horas," illa diceva. "Mais nostre recerca monstra que il ha un puncto de resultatos decrescente."