Un gruppo de recercatores del Universitate National de Australia ha
relevate le provas de un evento que probabilemente ha stimulate le epidemia de
influenza del 1918, un del plus virulente que le historia rememora. Le
discoperta, describite in un articulo divulgate in "Science" ha essite facte
analysante le datos genetic relative al virus, e nunc le genetistas spera
succeder a comprender proque illo ha essite assi mortal.
Le epidemia se ha diffundite in tote le mundo, partiente de Statos Unite e
attingente Japon e Australia trans Europa, occidente ultra 20 milliones de
personas, plus que durante le prime guerra mundial, tosto terminate.
Le virus non ha essite insulate e conservate in ille tempore e le
recercatores credeva que illo era perdite pro semper. In le 1999, tamen, se ha
obtenite material genetic per un victima, que le corpo era remanite sepelite in
le permafrost de Alaska, e per specimenes extrahite ex duo soldatos american
morite durante le epidemia e mittite sub alcohol per un medico de ille tempore.
Le recercatores ha potite assi extraher un parte del genoma del virus, e
confrontar lo con illo de altere brancas de influenza, sin trovar initialmente
explicationes plausibile. Nunc, tamen, on ha discoperite que un del genes del
influentia del 1918 era un hybrida, producite per partes de altere duo
vira del influentia forsan proveniente ex un animal como le porco per medio
de un processo cognoscite como recombination.
Le analyse indica que iste processo ha evenite justo ante le epidemia e
exactemente pro iste motivo on pensa que ha potite initiar le influentia. Nunc
on va studiar le possibilitates que brancas actual de influenza poterea
recombinar se e dar initio a un altere periculosissime epidemia.
Per "Le Scienze online" del 2001.09.08
Traducite per Luca Ghitti