Car amicos, in iste dies io vide in le jornales, in le television, in le magazines un massive publicitate re le nove moneta del euro que nos habera in le proxime anno. Le negotiantes expone le precios del mercantias e in euros e in liras, le contabilitates del firmas es nunc in euros, le bancas invia le contos currente in euros, e in iste septimana io ha vidite le quitantia del electricitate e del telephono indicate in euros. Finalmente on ha decidite que le parola "euro" in italiano es indeclinabile proque illo es le forma contracte de Europa, assi le singular es " l'euro" e le plural es "gli euro" e non "gli euri", ma io aude sovente dicer "gli euri" proque il ha le influentia dialectal de mi region. Nunc in le population italian il ha un specie de timor in usar le nove moneta. On ha timor de esser dupate per homines dishoneste con le resto del monetas durante le pagamento del mercantia. Le lira ha un grande differentia de valor in respecto al euro, 1 euro = 1936,27 liras e assi nos habera le centesimos in nostre calculo del precio. Le centesimos ha disparite post le secunde guerra mundial a causa del grande inflation e le nove generationes (io mesme) non es accostumate al centesimos e isto pare satis preoccupante al gentes. Un augmento de 30 0 50 centesimos a prime vista non pare multo importante ma si io face le conversion illo es satis elevate: circa 600 - 950 liras. Assi in iste dies il ha le recerca de parve (it) "convertitore"/ convertitor (?) electronic que face le calculo del conversion lira/euro rapidemente e sin errores! Le cosa le plus insolite es que nos trova ubique le precios scripte in euros, ma materialmente necuno ha viste le monetas, necuno ha realmente tangite le billettes de banca. Le prime gruppo de monetas nos lo potera retirar in le bureaus de posta in le medietate de decembre e nos initiara usar los in januario 2002. In tal maniera nos ha ancora non le possibilitate de accostumar se a iste nove moneta, a iste nove cambio de valuta. Qual pote esser le impacto real del population re iste nove euro nos lo videra in le proxime menses. Securmente in le prime dies nos habera multe confusion e errores super toto proque il non habera nove euros bastante pro totos! Le sito official del euro in rete: www.euro.ecb.int Euromente vostre! Luca Ghitti