Un butino de 161 ossos fossile pro un peso de 700 kg. Es istos le cifras
del prime mission numquam tentate pro "piscar" in le mar del Nord retrovamentos
de animales extincte. Iste mission ha essite arrangiate per Bernard Buigues e
Dick Mol, duo scientistas e exploratores qui proba cognoscer
major informationes re un del plus fascinante mysterio del historia de
nostre planeta: le extinction de massa occurrite circa 10.000 annos retro, de
centenas de species animal, tote mammiferos de grande dimensiones, e le mammut
lanose ha essite le symbolo de iste extinction. E pro recuperar le retrovamentos
fossile del lontane ancestre del elephante, Buigues e Mol ha explorate durante
sex dies le fundo marin proxime al costa hollandese.
Le analyse del fossiles remanite aduncate al retes de pisca ha interessate
duo formationes geologic diverse e ha permittite de colliger retrovamentos de
tres species de mammut que ha populate Europa in tempores successive. Explica
Mol: " Ultra 10.000 annos retro quando le mammiferos afflueva in le planas
europee, ubi hodie se aperi le Canal anglese (le Manica), se extendeva
vastissime terras emerse; le costa era multo plus distante de ille actual, circa
400 km a nord del estuario del Thamese, que a ille tempores se conjungeva con le
Rheno pro formar un sol fluvio; a su lateres il habeva un verde e ample
plana, ric de terreno pro le pastura ".
" Quando le animales moriva, illos veniva lentemente inglobate in le
terreno. In iste maniera se ha create in le curso del millenios,
enorme jacimentos de fossiles. Post un aspere mutation del climate, circa
10.000 annos retro, le temperaturas initiava altiar se e le glacieros polar
initiava disgelar se. Le effectos ha essite un progressive altiamento del
mares, le quales ha submergite vaste territorios; 2.000 annos retro, le insulas
britannic era de facto separate ab le resto de nostre continente e le actual
Paises Basse habeva devenite un zona paludose invadite per le mar".
Exlica de novo Mol: " Le repertos del mammut lanose dona a nos un dramatic
testimonio de un improvise extinction, occurrite a pena 10.000 annos retro. Le
serie del fossiles de iste specie, que initia 350.000 annos retro, se arresta,
de facto, asperemente a ille epocha".
Per le revista "Quark"
Traducite per Luca Ghitti