Duo cosmologos ha reproponite super le magazin "Science" un modello de universo cyclic, in le qual le cosmo transi un serie infinite de Big Bang (le grande explosion), e pois per periodos de expansion e de halto, le toto regulate per un energia obscur ancora non explicate. Secundo le modello ora le plus admittite, le universo ha habite origine per le Big Bang, que ha essite sequite per un phase de expansion multo rapide e un successive, le actual, de expansion plus lente. Iste modello sembla explicar alicun characteristicas del universo que nos observa, como le facto que illo appare semper equal, independentemente del direction in le qual nos lo reguarda.
Secundo Paul Steinhardt del Princeton University e Neil Turok del Universitate de Cambridge, le Big Bang non ha essite un initio, ma solmente le ultime de un serie infinite de cyclos. Le scientistas sustene que le modello actual presenta alicun grave problemas, como le incapacitate de explicar a nos que cosa ha occurrite ante le Big Bang e de previder le fin del universo. Iste problemas ha augmentate quando alicun observationes de supernovas remote, monstrava que, le expansion del universo ora accelera. 
Isto ha suggerite al cosmologos le vetule idea de Einstein: le costante cosmologic, un specie de energia obscur con fortia de gravitate repulsive. Le costante cosmologic, ha essite poste al centro del nove modello e illo sembla previder un cyclo que comprende un Big bang e un periodo de expansion talmente longe, que pote lassar le universo vacue. "Le universo cambia su characteristicas in le tempo. Al fin, le campo de energia initia accumular semper plus energia usque al puncto que illo deveni instabile e explode, producente materia e radiation e initiante in iste maniera un nove cyclo", explica Steinhardt.
Constatar hodie, quales inter le duo modellos es le plus correcte es impossibile, ma iste situation poterea cambiar quando il sera possibile observar le undas gravitational. 
In iste ultime dies un grande adjuta al cosmologos ha venite per le telescopio spatial Hubble. Le bellissime imagines del ACS, le nove lente installate al initio de martio in le telescopio, ha monstrate un qualitate 10 vices melior del vetule lentes. Ora le ACS permittera vider le "zona del crepuscolo", quando le galaxias initiava formar se post le explosion del Big Bang. 

Luca Ghitti