Hodie nos festa le vigilia del die del medie-estate. Il es le solstitio estival hodie e nos va a tempores plus tenebrose. In tote Svedia on hodie errige arbores de maio, que in facto es un cruce ornate con flores. Es interessante saper si lo bracio crucial es un invention christian. Isto ego non sape. Sed le medie-estate con le palo de "meriestate" (pensa de "meridie") es le sol festa salvo illo del nove anno que non ha un accolation religiose. Ben que on lo appella le die de Sancte Iohannes, ma multo poco svedeses pensa de isto. Ante toto on pensa que il es le die del medie del estate. Deman essera un die libere. Le centro de festar le medie del estate es le provincia "Dalarna" (que significa "Vallatas"). Le nomine on latinisava a "Dalecarlia". Isto es nostre provincia traditional e certo cento mil festantes va a Dalarna pro celebrar le medieestate con le solstitio vernal! On dansa circum le Palo de maio, palo vernal. Il ha dansas-jocos que on canta e dansa. Le infantes participa. Ecce le momento quando le estranieros pote esser confundite vidente le dansa national "Le parve ranos" que omnes, adulte e infantes lude e canta con grande enthusiasmo. "Le ranettos es belle spectar, non caudas non aures ha illos!" es in curto le message del canto, E postea on salta e face le sono del ranas.... Postea on mangia. Quando le parte del infantes es finite comencia le parte del adultos, quando on bibe (sovente troppo) multo, e dansa. Le plus curte nocte del annos es magic, tanto como le plus longe nocte in decembro. Il es in le medieestate que le plus grande numero de infantes es concipite, secundo le statistica.... Que mangia on? Haringos con patatas fresc, recentemente effodite ex le terra! E con isto, le vodka, bira o altere biberages. In le campania on grilla. Como vos comprende isto es le die de esser in le sino del natura. De gauder se del verdura. Nos ha tanto poco sol in le hiberno que ora nos es folles solar. Le medico face signos de advertimento. Pensa del cancere del pelle! E assi le sol va disapparir alcun minutas post le hora 22 in Uppsala. In Kiruna illo nunquam es sub le horisonte. E illo se levara deman super un pais dormante, salvo illes qui non finirea le festa le die antecedente! Kjell R