Car amicos, Pardona me que io scribe in iste lista super un thema que deberea esser tractate in le coollist. Ma mi problema con le coollist continua. Ben que le messages que alteres scribe in le coollist, me attinge, le lista retorna le messages que io invia a illo. Pro iste ration io consilia a personas qui non es interessate in subjectos linguistic de deler iste message immediatemente. Io debe confessar anque que io non ha legite omne messages que in le ultime septimanas on ha scribite super le le verbo "interferer" o "interferir". Le repetitiones interminabile de lo que alteres jam ha scribite, rende assatis fatigante (pro non usar un parola plus forte) le lectura del messages e isto causa que on cessa de leger los, super toto quando on ha anque altere labores (i.a. pro le promotion de interlingua e pro le UMI) a facer. Dunque de novo, pardona me, si io scribe nunc cosas que on ha jam tractate e forsan solvite. Io crede que finalmente le plus grande parte del participantes al discussion ha concludite que le "interferer" del IED es un error e que iste forma debe esser reimplaciate per "interferir" (appoyate per espaniol, portugese e italiano). Ma que facer nunc con "interferentia, interferente, interferential"? Esque illos deberea esser cambiate in "interferientia, interferiente, interferiential"? lsto me pare impossibile, viste le equivalentes in le linguas fonte de interlingua, ubi le -i- manca in iste tres parolas. Salutes amical de Piet Cleij