Car Mario, Io non sape exactemente lo que tu vole communicar in tu message recente a me, ma il ha cinque commentarios que io vole facer in iste momento sur le formas de textos imprimite: --- (1) Facer photocopias in bibliothecas universitari american es multo economic. Academicos qui los usa pote, si illes vole, copiar libros vetule--que nos dice del seculo XVIII o XIX--que non ha essite re-imprimite. On anque pote photocopiar libros plus recente. Que nos dice que on vive in San Luis Obispo, California, un parve citate ubi il non ha librerias grande ma ubi il ha un branca del Universitate Statal de California. On poterea usar le bibliotheca de iste universitate pro copiar libros recente si on non pote trovar los facilemente in altere partes de San Luis Obispo. --- (2) Le libro mesme con duo coperturas e un numero indefinite de paginas in su interior es solmente un ex diverse manieras de contener paginas de textos. Textos plus breve generalmente appare in magazines e jornales (e altere collectiones minus formal). On anque pote colliger, que nos dice, 20 o 30 articulos ex un magazin o journal e publicar los in le forma de un codex/codice (libro). Tal publicationes es anthologias. --- (3) On anque pote portar (collectiones de) textos in quadernos de studiante o in diverse tipos de folios plicabile. Si tu voleva imprimer (un parte del)/(le) textos de "Interlingua in interlingua" tu poterea portar los facilemente in diverse tipos de quadernos. Tu anque poterea photocopiar los pro le uso de alteres. Il ha establimentos commercial in le Statos Unite ubi on pote colliger a in diverse tipos de libros/quadernos (collectiones de) textos a un costo minime. --- (4) Post finir mi prime redaction de ille collection de cinque contos multilingue in Interlingua, io va colliger mi versiones in interlingua con le versiones in anglese, francese, germano, e espaniol in un quaderno, le qual io poterea facilemente copiar un numero de vices illimitate pro distribution a alteres. Io spera que ante multe tempore io va poter publicar los in le Rete de maniera que alteres potera discargar los in forma imprimite, si illes vole, e inquadernar los o photocopiar los pro studio personal o pro uso in classes ubi illos poterea esser utile. --- (5) Usque nunc il ha essite multo plus facile leger textos sur papiro in forma imprimite que sur ulle tipo de artifacto electronic. A causa de iste circumstantia, multe personas prefere imprimer lo que illes discarga ex le Rete pro lectura posterior proque illes se fatiga multo facilemente usante le schermo como un medio de lectura. In le futuro, con melior technologia, il habera artifactos electronic que displicara textos imprimite (e anque photogrhias!) tan facile a leger que le productos de bon impressores currente. Quando arrivara tal artifactos, le uso de papiro essera multo plus reducite, forsan mesmo eliminate (como se vide in le programma de television Star Trek). __________________________________________________ Do you Yahoo!? Yahoo! Mail Plus - Powerful. Affordable. Sign up now. http://mailplus.yahoo.com