Con respecto al uniformitate in scriber e pronunciar le latino, Harleigh ha ration. Post le collapso del Imperio de Roma in le quinte seculo tote le populos in le region del imperio ha continuate a parlar lor latino. Illes legeva le textos administrative in lor lingua materne, e illo esseva, illes pensava lor lingua materne, possibilemente alquanto formal. Alora in 800, Carlo Magne ha unificate un grande parte del previe region del Imperio, e ille mesmo appellava su "imperio" le "Imperio de Roma". Assi personas de varie partes de iste imperio esseva ordinate a venir a su corte pro discussiones inter illes super problemas del imperio. Lor accentos esseva multo distincte e a vices alquanto incomprehensibile. Carlo Magne ha decidite que il debe haber un standard maniera de pronunciar le latino. Ille invitava un scholar de Brittania qui esseva un specialista in le latino e qui pretendeva parlar in le maniera del antique romanos. Iste homine esseva Alcuin, e ille introduceva nove regulas pro pronunciar le textos latin. E Carlo Magne addeva su autoritate a tal pronunciation. Illo esseva le latino official. Subitemente tote le mundo discoperiva que iste latino non esseva le latino de lor lingua materne. Illo esseva un nove creation. Si o non le Romanos ha ja parlate in le maniera de Alcuin, necuno poteva dicer. Mais a iste puncto lo que esseva officialmente latin, non esseva le latino que illes parlava in lor excambio quotidian. Assi le linguas romance esseva nascite. Il non esseva un recognition que lor linguas ha devenite tanto distincte del latino, mais que lo que esseva "latino official" non plus esseva lor lingua, que illes semper ha pensate esseva le latino. Assi un distinction inter le latino official e le linguas parlate esseva create, e isto esseva le comenciamento del linguas romance como linguas distincte del latino. Alcun scholares crede que per medio de iste nove pronunciation, Carlo Magne esseva capace de extender su poter per controlar mesmo le parola de su subjectos. Stan Mulaik