LE MANIFESTO DE UN BLOGATOR Un possibile revolution in le jornalismo (Adaptate de un articulo publicate in <http://www.AndrewSullivan.com>. In 1999 unes amicos mie suggereva que io inaugurava mi proprie sito in le Rete. Un amico mie me adjuvava con le designo del sito, e io admirava su apparentia. Me placeva reciper litteras electronic de mi lectores e haber un sito ubi omne mi obras esseva immagazinate. Ma io non sapeva ni quales poterea esser le functiones de iste medio nove ni exactemente como io debeva scriber pro illo. Tunc io discopereva Blogger <http://www.blogger.com>. Le parola veni del expression anglese "web log", que simplemente significa un diario electronic personal. Usante Blogger, vos pote inaugurar un publication con ulle pensamentos vostre, sia stupide, sia brillante. Blogger mesmo provide formatos simple pro personas qui non cognosce HTML. E le servicio es gratis. Io nunc sape que Blogger es le Napster nascente del industria de jornalismo. Como Napster portava musica a su usatores gratis, Blogger porta informationes a su lectores sin le necessitate de canalisar los trans magazines e jornales e lor redactores e proprietarios. Omne autor nunc pote haber su proprie publication completemente personal. Le numero de blogs nunc cresce per plus que 10.000 cata mense, e Blogger mesme ha 150.000 usatores. Le vaste majoritate de illos es parve publicationes, sovente solipstic, e leger los es como leger le diario personal de un persona durante que ille o illa lo scribe. Un ex le blogs le plus vetule es illo de Justin Hall, cuje "Links from the Underground" dava detalios, inter altere cosas, de su passion pro drogas e sexo. Ma plus tarde multe blogs ha devenite un collection miscellanee de ligamines a altere articulos in le Rete, commentarios personal sur eventos currente, debattos politic, gruppos de discussion sur libros, e multe altere cosas. Io comenciava mi proprie blog con copias de articulos que io habeva scribite pro diverse publicationes. Io tunc comenciava le publication de parve commentarios personal al minus duo vices cata die. Io informava mi amicos de iste activitates e les invitava a leger lo que io scribeva. Ma intra duo septimanas mi blog comenciava un evolution curiose. Io habeva, forsan 500 lectores, e unes ex illes comenciava scriber me lor proprie commentarios. Illes me inviava ligamines, ideas, e altere informationes que io addeva al blog. Ante multe tempore, forsan le medietate del informationes publicate in mi blog se derivava ex le suggestiones de mi lectores. A vices lor cognoscimentos sur certe cosas esseva plus grande que le mies. Durante le crise in nostre election presidential inter Bush e Gore, pro exemplo, un communication ex un professor de politica in Florida me dava multe information que io apprendeva ante altere jornalistas, e io esseva le prime inter illes a publicar lo in le medios de communication traditional. Con omne iste activitate, mi blog cresceva continuemente. Io non habeva ulle budget pro publicitate. Io simplemente me identificava como su autor e explicava lo que io faceva con mi blog in unes programmas de television. Tosto io recipeva 5.000 visitas diarie de plus que 2.000 personas. Gradualmente, mi blog deveniva alique simile a un programma de radio continue, e illo deveniva le activitate principal de mi vita. In un publication traditional, le lectores de un jornalista poteva communicar con ille o illa per un numero multo reducite de litteras al redactor. Ma cata die io recipeva forsan 100 litteras electronic sur alique que io habeva scribite solmente unes pauc horas antea. Io tunc addeva un pagina pro litteras electronic a mi blog. Tosto on scribeva litteras electronic in responsa a altere litteras electronic. Ante multe tempore, mi blog recipeva presso 8.000 contactos diarie. Tunc veniva le attaccos in New York per Al Qaeda. Io habeva sentimentos profundemente personal sur iste evento, e omne mi lectores habeva lor proprie perspectivos sur illo. Io comenciava scriber sur mi proprie sentimentos personal, e mi lectores respondeva con un intensitate que io non ha trovate in ulle altere forma de publication jornalistic. Durante unes menses post le attaccos, illos deveniva le sol thema de discussion inter mi lectores. Illes inviava poemas, historias, narrativos sur lor experientia in le prime persona del singular. Mi blog pareva specialmente designate pro iste scopo. Tosto mi lectores revelava que illes non voleva solmente informationes jornalistic sur iste tragedia. Illes voleva le communication plus general e personal sur illo. Illes voleva un ambiente ubi illes poteva narrar lor proprie sentimentos e reciper le responsas de alteres. Illes voleva appoio emotional e ligamines psychologic plus intime le unes con le alteres. In iste circumstantias, le natura multo personal de blogs habeva un certe resonantia que on non trovava in le productos jornalistic impersonal de nostre corporationes. Mi lectores esseva multo sceptic del contento que illes trovava in UPI, Reuters, Time Magazine, Newsweek, e le altere publicationes impersonal de nostre corporationes; e illes prefereva supplementar iste information con commentarios de altere autores que illes cognosceva e qui les placeva. Le numero de mi lectores se duplicava in solmente un die o duo. Tosto mi sito recipeva plus que 500.000 visitas mensual. E il habeva altere "warblogs" (blogs sur le guerra). Un professor de derecto, Glenn Reynolds, inaugurava un sito de commentario politic nominate "Instapundit.com", e tosto ille attraheva multissime lectores. Alteres, como Mickey Kaus (kausfiles.com) e Josh Marshal habeva experientias simile con lor proprie sitos. Tosto le Wall Street Journal addeva un blog a un sito sue in le rete, OpinionJournal.com, con "The Best of the Web Today" (le melior del Rete publicate hodie). Tunc appareva "Overlawyered.com" sur le excessos inter nostre homines de leges e nostre systema judicial. Nostre medios de communication traditional discoperiva que illos habeva un forte competition ex le blogatores. Un quantitate crescente de lectores usava information in lor blogs predilecte pro discoperir lo que esseva digne de attention in nostre medios de communication traditional. E multe blogatores poteva leger commentarios imprimite in nostre jornales e responder a illos ante lor apparation in le stratas. Durante que iste forma de publication deveniva plus matur, multe blogatores se demandava como illes poteva ganiar moneta ex lor effortios. Il esseva difficile obtener reclamos publicitari traditional proque multes ex illes criticava fortemente le practicas de nostre corporationes. Multes ex nos tunc provideva a nostre lectores manieras facile de facer donationes a nostre publicationes. Quando io inaugurava un tal mechanismo in mi proprie blog, io primo recipeva parve quantitates de moneta. Me le quantitate augmentava, e in 2001 io recipeva $27.000. Quasi omne iste moneta io usava pro meliorar le capacitates de mi sito. In isto mi fortuna ha essite melior que illo del major parte del altere blogatores. Ma grande donationes de moneta non ha un importantia multo critic. Le avantagio tremende de blogs es que il costa quasi nihil establir los. Il non es necesse prender un officio in location o pagar le salarios de receptionistas, secretarios, e personal technic. Rebus sic stantibus, mesmo pauc donationes significa multo. Recentemente, io essayava alique nove, un club de libros permittente que io e mi lectores legeva le mesme libro e faceva commentarios sur illo durante que nos lo legeva. In nostre prime mense, circa 1.000 de mi lectores comprava copias del libro trans amazon.com, que me dava $2,50 pro cata libro vendite a mi lectores. Nos habeva nulle subscriptiones, nulle reclamos comercial, nulle effortios de marketing. Nos habeva solmente un communitate in le cyberspatio que se manteneva economicamente a cambio de multo pauc moneta. Mi proprie successo in iste effortios es exceptional, e on non sape si eventualmente blogs simile al mie devenira viabile commercialmente. Pro le majoritate vaste de blogatores, lor publicationes es solmente un hobby. Ma unes pauc blogatores ha un collection de lectores multo simile a illo de multe autores publicante in nostre medios imprimite traditional. Recentemente, mi blog recipeva 800.000 contactos de 220.000 differente personas. Le blog Instapundit ha un simile numero de lectores. Multe revistas non ha tante subscriptores. Revistas como "The New Republic" typicamente ha inter 50.000 e 200.000 subscriptores. Naturalmente le subscriptores a tal revistas paga plus que mi lectores pro reciper le information publicate in illos. Ma si le scopo de un autor non es ganiar moneta ma influentiar su lectores, le blogs nunc da un forte competition al revistas e jornales traditional. Tal jornales nunc comencia lor proprie blogs, como "National Review Online". E "Slate" e "Salon" duo revistas originalmente electronic, nunc comencia blogisar se. Iste nove forma de publication pote devenir vermente revolutionari. Lo que illo significa es que nulle autor ha besonio de un mecenas o un proprietor con multe moneta pro communicar con su lectores. Ille o illa anque non ha le necessitate de placer a un redactor con su proprie prejudicios. Psychologicamente, isto significa multo. Quando le epocha de Gutenberg comenciava, multes regrettava le production in serie del parola scribite, timente que multe cosas trivial e completemente sin valor facerea un competition forte a obras de un valor importante, e vermente iste prediction deveniva ver con le disveloppamento de papiro economic e machinas de imprimer accopulate mechanicamente con motores a vapor. Sin dubito multe publicationes de un valor dubitose anque apparera in le cyberspatio. Ma il essera possibile trovar le publicationes de valor con diverse mechanismos que emergera e que functionara, pro exemplo, como bibliographias annotate. Le Rete tamen facilitara multo le uso de tal "bibliographias" proque ligamines electronic permittera le accesso instante al obras que illos describe. [Multe interlinguistas jam ha demonstrate tal accesso in lor proprie messages in lor foro de discussion a Saint John's University. -hk] Naturalmente il es licite demandar se si le emergentia de blogs es un ver revolution in le jornalismo e le publication. On non sape con confidentia. In le mundo de computatores e le universo del cyberspatio, multe predictiones de cambios permanente ha evaporate con le menses e annos. Ma il es ver, nonobstante, que blogatores es forsan inter le prime autores dirigite per lor lectores e le medio que illes usa pro publicar. Le major parte del jornalismo traditional es como le television american inter 1950 e 1960. Le prime programmas de television usava le patronos de programmas de radio ante discoperir que le television habeva su proprie characteristicas que exigeva nove formatos de programmation. E lo que multe jornales e revistas face in lor versiones electronic es assatis simile. Illes solmente presenta un version pixillate de lo que illos jam face sur papiro. Le forma de communication del blogatores es completemente nove, e illo non pote replicar se in altere medios de communication. Lor medio de communication ha characteristicas e de magazines e de programmas de radio al quales on pote telephonar pro facer commentarios instantemente. Blogs es anque medios completemente democratic disponibile a omnes, ricos e povres, qui senti un certe urgentia pro communicar lo que illes vole dicer. E le voce de tal personas deveni de plus in plus forte. Stay tuned. __________________________________ Do you Yahoo!? Yahoo! SiteBuilder - Free, easy-to-use web site design software http://sitebuilder.yahoo.com