Lo que Stan scribeva del mixa in Georgia Tech e in le Statos Unite e Grande Britannia es multo interessante. Le attitude in re varie vestimento "religiose" es multo ingeniose in Grande Britannia. Ci in Svedia il habeva ante alcun annos un sikh qui - si ego ben recorda - perdeva un processo in le "Corte de labor" proque ille non era emplate in le Tramvias del urbe Göteborg. Le immigrantes in le Statos Unite veniva a un pais ubi quasi omnes es immigrantes, durante que in Europa il ha satis parve gruppos etnic. Isto forsan decide le possibilitates de ghettoisation etc. Ci in Svedia le autoritates _proba_ integrar le population, ma il es obvie que in alcun partes de Uppsala (pro exemplo) il habita plus de immigrantes in certe partes del urbe que in alteres. Cata persona qui ha habitate in un altere pais sape que il es satis facile que on crea un circulo de amicos e cognoscitos qui es compatriotas. Le optime integration occurre si tu es le sol estraniero in un gruppo. Si il ha un grande gruppo de estranieros-immigrantes alcun personas va prender le rolo (parte) de mediatores que manea le contactos con le cultura ambiente. Le termino sociologic pro isto es le anglese "broker". Le "brokers" manea le contactos con le ambiente altricultural. Le ghettoisation es - il me sembla - relative in Europa e forsan depende del grandor del paises. Como ego comprende le differentia, in le Statos Unite omnes ha habite le derecto facer como illes vole, haber su proprie scolas etc. e post un certe tempore le gruppos nonobstante assimila. In Svedia, pro exemplo, le balticos, ante toto le estonianos, habeva lor proprie scolas, gymnasios etc. E le refugiatos hungare de 1956 habeva anque un proprie gymnasio e poteva facer le baccalaureato svedese con un curriculo in hungaro (ma con studios del svedese, naturalmente). Ego sape que le armenianos ha inseniamento in armeno durante le sabbatos, ma como es con altere gruppos ego non sape. A mi aviso nostre mundo se trova in un processo de migration que face le migration del populos durante le prime millennio como un facile vento in comparation con le grandissime micration que occurre in nostre dies. Illo certo habera effectos in le question de nationalitate (si non etnicitate) in tote le mundo. Forsan solo le grandissime nationes como Statos Unite, Grande Britannia, Francia, Germania e Russia (pro mentionar solo un pauc) essera non-tangite de isto. Kjell R