Le message recente con le linea de subjecto "Re: msg reply" contine un virus. Non aperi le attachamento! Le message contine in le capite "From:" le adresse de Stan Mulaik, un membro de iste lista. Totevia, le computator de Stan multo probabilemente non lo ha inviate, proque le viruses hodierne falsifica generalmente le addresse del inviator in le capite del message. Le servitor de listas LISTSERV non ha blocate le message proque le virus ha falsificate le adresse de un persona con le privilegio de inviar messages al lisa. Pro iste ration, le blocage regular del messages con adresses de non-membros del lista non es plus un defensa sufficiente contra le viruses. Pro impedir le proliferation futur de viruses per INTERLNG, io ha cambiate le configuration assi que tote le attachamentos del messages essera filtrate via. Infortunatemente isto impedi equalmente le distribution del attachamentos legitime. Si vos ha materiales a publicar que non pote esser "copiate e collate" in un e-mail a texto pur, per favor publica los in un sito web e invia le adresse URL al lista, o alternativemente annuncia le disponibilitate del file in question e invia lo privatemente al personas qui indica interesse. Le messages con attachamentos non essera totalmente blocate; illos essera distribuite sin lor attachamentos. Isto significa que messages con viruses essera convertite a messages vacue e innocue, ma enoiose. Si illos devenira troppo frequente, il es possibile in le futuro que le messages con attachamentos debera esser blocate completemente. Io spera que Ensjo como administrator principal de iste lista respondera con su commentos e/o facera su proprie cambiamentos si ille non es de accordo con mi action. Cordialmente, - Martijn (administrator adjuncte)