Car amicos, Io vole continuar mi message de hodie, que ha essite expedite a nostre gruppo ante que io lo ha finite. Io traduce un pagina del libro de Thijs Voskuilen: "Io cita hic un fragmento del libro THE JESUS MYSTERIES de Timothy Freke e Peter Gandy. Iste autores enumera un numero de elementos del religiones pagan que esseva currente in diverse partes del mundo del Antiquitate, in le tempore ANTE Jesus. Un idea central in iste religiones esseva sempre un sorta de Homine-Deo, que le autores nominava 'Osiris-Dionyso'. Iste fragmento contine characteristicas que Jesus haberea, e que diverse religiones in le tempore ante Jesus jam attribueva a iste 'Homine-Deo'.: - Jesus es le salvator del humanitate, ille es le Deo facite homine, ille es le e Fils de Deo qui equivale le Patre; como Osiris-Dionyso. - Jesus nasceva de un virgine mortal, qui va a celo post su morte e qui es venerate como un essere divin; como Osiris-Dionyso. - Jesus nasceva in un cava le 25 de decembre o le 6 de januario; como Osiris-Dionyso. - Le nascentia de Jesus es predicite per un stella; como le nascentia de Osiris-Dionyso. - Jesus es visitate del Magos, qui esseva discipulos de Osiris-Dionyso. - Jesus offere a su discipulos le baptismo eterne de aqua, aere e foco; como in le Mysterios pagan. - Jesus cambia aqua in vino durante un festa de nuptias al mesme die que, secundo un credentia ancian, Osiris-Dionyso cambiava aqua in vino durante un festa de nuptias. - Jesus cura le malados, expulsa demonos, produce repastos miraculose, adjuta piscatores pro haber capturas extraordinari e calma le aquas pro su discipulos; magos pagan jam habeva facite tote iste miraculos. - Como le magos del Mysterios, Jesus es un facitor ambulante de miraculos, que on non lauda in le urbe de su origine. - Al initio su discipulos non recognosce Jesus como un deo, ma alora ante lor oculos ille es transformate in tote su gloria; le mesmo vale pro Osiris-Dionyso. - Jesus ha dece-duo discipulos; como Osiris-Dionyso - In triumpho Jesus, sedite super le dorso de un asino, entra in un urbe, durante que le multitude saluta con brancas; como Osiris-Dionyso. - Jesus es un homine juste que a torto on accusa de blasphemia e del fundation de un nove religion; como Osiris-Dionyso. - Jesus attacca hypocritos, ille se oppone a tyrannia e sin protestationes ille va al incontro de su morte, annunciante que ille va resuscitar post tres dies; como le magos pagan. - Jesus equivale a pan e vino; como Osiris-Dionyso. - Le discipulos de Jesus mangia pan de maniera symbolic e illes bibe vino pro unir se a ille; como le adeptos de Osiris-Dionyso. - Jesus es cruciate; como Osiris-Dionyso. - Jesus mori como un sacrificio pro remover le peccatos del mundo; como Osiris-Dionyso. - Post su morte Jesus descende al inferno, e al tertie die resuscita del morte ante su discipulos, ille ascende al celo, ubi ille es ponite al throno per Deo, e attende su retorno como un judice divin al Fin del Tempores; como Osiris-Dionyso. - On dice de Jesus que ille habeva morite e ha resuscitate del morte al exactemente le mesme data que on festa le morte e le resurrection de Osiris-Dionyso. - Le tumba vacue de Jesus es visitate per tres adeptas feminin; anque Osiris-Dionysis ha tres adeptas feminin qui visita un tumba vacue. - Per le participation a su suffrentias Jesus offere a su adeptos le chance de nascer de novo; como Osiris-Dionyso. Que pensar de iste fragmento del libro del duo americanos? Esque on deberea concluder que le christianismo de Paulo es solmente le combination de multe ideas e credentias jam existente in le paganismo de su tempore? Salutes amical de Piet Cleij www.interlingua-nl.com