Car Ingmar de Hollanda, Ingvar de Svedia te saluta! Nostre prenomines es differente per solmente un littera: tu m es in mi nomine replaciate per un v - v como in vincer, victoria, victor... Hmm, tu certo comprende mi allusion tanto subtil... Io debe adder que io sape absolutemente nihil de futbol (o football, ma iste "guest-word" anglese ha significationes ditterente in Europa e le Statos Unite, intra le mesme lingua). Como non-initiate io naturalmente ha forte convictiones que on deberea reformar le regulas del joco: le idea de iste sport es evidentemente que on vole poner un balla de corio a in le cavia del goal al fin del area. Isto, car amicos, esserea multo plus facile e econimisarea multissime tempore si on removeva le homine qui sta ante le cavia e face effortios continue e persistente pro impedir le balla a attinger le fundo del cavia.... Nunc seriosemente: Io te congratula pro tu initiation rapide e successose in Interlingua! Como tu dice, pro nos germanicos e altere nonromanophonos Interlingua, benque facile, es minus facile que pro espanioles etc- Nos comprende que nos debe studiar le lingua. In tu pais se trova alcun del interlinguistas le plus importante: Piet Cleij, secretario general de UMI e lexicographo, Louise Delnoy, administratice de UMI, Frits Goudkuil, editor de libros in Interlingua e Karel Wilgenhof, autor de un grammatica de Ia scribite in Ia. Contacta le Servicio de Libros www.interlingua.com/libros. Nostre grande problema es - como tu jam ha notate - que le mundo non sape de nostre existentia e del qualitates e potential de Interlingua- UMI ha nulle moneta, sin moneta, non multe reclamo, sin reclamo nulle membros supportante, sin membros - nulle moneta - sin moneta..... Le classic circulo vitiose! Le propaganda (nos prefere "information") debe facer se ubi on attinge le publico - in le television, in le radio e in le pressa. Il es difficile facer publicate un articulo, ma communicatos al pressa e super toto letteras al redaction es gratuite e multo efficace! On pote ibi referer le lector a nostre sitos del web, le quales alteremente non trova multe lectores, ubi se trova un abundantia de information ulterior, textos, tosto eLibros, exemplos de Interlingua parlate etc. In un interview/intervista in le radio national, de septe minutas ante duo septimanas io, per hasardo...mentonava nostre cursos intensive in un schola-internato hic in Svedia in julio. Le resultato immediate esseva plus que vinti telephonatas e dece-quatro personas se annunciava pro le curso pro novicios. Face simile actiones in Nederland e vos habera resultatos!! Comencia post le match que comenciara in un hora! Fortia, Ingmar de Hollanda! Tu ha comenciate multo ben tu carriera in nostre gruppo - benvenite inter nos! Amicalmente, Ingvar Ingvar Stenström Vegagatan 12 S-432 36 VARBERG, Svedia Tel. +46-/0/340-15053 [log in to unmask] www.interlingua.com www.interlingua.nu