Car amicos, Il ha un thema que pote inflammar le spiritos del homines e pote crear discussiones finiente in querelas e in accusationes mutual: politica. Deberea nos evitar dunque iste thema e restringer nostre discussiones a subjectos plus secur e innocente? Io crede que no. Anque in le casos de punctos de vista politic multo differente o mesmo diametralmente contrari, tal discussiones pote esser interessante e valorose. Ma naturalmente un condition necessari es que on evita le degeneration del discussion in un querela grossier e vulgar. Sequente le exemplo de Stan, qui ha publicate un traduction del articulo importante de Thomas Friedman, io ha le corage de inviar vos le traduction de un articulo del professor nederlandese Karel van Wolferen in le jornal liberal le plus importante de mi pais. Iste articulo reflecte le pensatas de multe nederlandeses, qui ha sentite le reelection de Bush como un ver catastrophe. Salutes amical de PietCleij NRC Handelsblad, 21 novembre 2004 Articulo scribite per Karel van Wolferen, Professor "Comparation institutiones politic e economic" del Universitate de Amsterdam Traduction per Piet Cleij EUROPA DEBE TORNAR LE DORSO AL MUNDO DE PHANTASIA DE BUSH Le reelection de Bush e le continuation del neoconservativos in le positiones claves fortia Europa a optiones dramatic a fin de non plus impericular le relativemente stabile ordine del mundo. Le reelection de George W.Bush exige un determination de position de un formato que non jam ha occurrite desde le Secunde Guerra Mundial. Lo que, durante tres annos, pareva un presidentia excentric, realisate plus o minus per accidente, un presidentia que non poteva esser le representation del americanos respectabile que nos totes cognosce, va continuar, durante le veniente quatro annos, a destruer sempre plus le republica american e a render le mundo multo plus insecur. Isto sona como un grande exaggeration. Nos non ha le habitude de parlar assi del pais que ha jocate un rolo principal in nostre liberation del mal nazistic, e sub le custodio del qual postea nos poteva sentir nos secur como parte del "mundo libere". Ma le nove realitate offere solmente perspectivas sombre, e illo nos fortia a adaptationes dramatic de securitates politic que nos ha possedite longe tempore. Nos es testimonios del decadentia del controlo del fortia regulante in le qual habeva confidentia tote le paises que videva lor avantage in un mundo stabile e relativemente pacific. Le reelection de Bush, le appunctamento de Condoleeza Rice como "Secretary of State", le mantenentia del neocons in positiones claves: toto isto significa que il non habera un cambio salvante in le circumstantias que nos ha vidite crear se ante un pauco plus de un anno e medie. Ante nos il ha insecuritate politic e economic, que essera plus grande que jamais desde le sequentias del Secunde Guerra Mundial. In iste caso io pensa non solmente al chaos in le Oriente Medie e al periculo que menacia le approvisionamento de carburante pro le paises industrial. Io pensa super toto anque a un crise in le confidentia in le dollar, e dunque a un menacia de tote le systema financiari mundial, e al crescente periculo del dissemination de armas atomic. Ultra isto il ha ancora le nove nidos de terroristas, create per le governamento Bush, e le mal exemplo de un campo de concentration (Guantanamo Bay), le tortura permittite e le infractiones al derectos civil. Il es certe que in le Statos Unite occurre un continue movimento al dextera, con un continue degradation del securitates social que ha essite create per le "New Deal" de Franklin Roosevelt e le "Great Society" de Lyndon Johnson. Le poteres executive e legislative in le Statos Unitees nunc totes es in le manos de un movimento dextere con scopos politic reactionari; per le appunctamentos de nove membros del Supreme Corte anque le poter judicial va esser conquerite in un futuro proxime. Isto ha potite realisar se per le poter politic del plutocratia del affaires, que tene anque le medios de communication in su prisa. Il es difficile de facer un altere conclusion que de constatar que isto es le fin del "checks and balances" del republica de Jefferson - e dunque le fin del republica ipse de Jefferson. Il vale le pena de considerar le question como isto ha potite occurrer, nam certemente le americanos non lo ha advocate super se ipse e super nos. Le classe obrer american e un grande parte del classe medie american ha essite disavantagiate materialmente desde Reagan. Anque sub Clinton un politica in favor del grande interprisas ha minate seriosemente le circumstantias vital de iste gruppo del population. In le confusion e indignation il prevaleva un explication facilemente comprensibile: toto es le culpa del "liberals" - le progressivos american - qui de maniera elitari age e, con lor predilection pro homosexualitate e aborto e lor opposition contra le biblia e le possession de armas, non tene conto del sensibilitates e le interesses de nos, povre gente. In le medio de un tal irrationalitate pote formar se un phantasia que ha devenite le factores decisive in le reelection de Bush - le phantasia de un pais in un guerra con inimicos cambiante. Le americano medie crede nunc jam durante tres annos e duo menses que su pais es menaciate continuemente e de un maniera seriose. Iste credentia es incitate usque al grado hysteric, e al mesme tempore il ha essite create un imagine de un presidente resolute qui nunquam dubita e qui es le melior option pro le victoria. Iste phantasia de guerra reposa super le confusion relative al metaphora de un guerra que in le senso litteral del parola non existe (e non pote exister, proque il non ha un parte adverse que pote capitular), e un bombardamento de mendacios producite per un dextere-republican machina de propaganda que es superior a toto lo que nos ha vidite super iste terreno in le historia de America. Breve tempore ante le electiones quasi duo tertios del votatores de Bush ha declarate que Saddam esseva le instigator del attentatos del 11 de septembre. In le relation inter America e le mundo il se ha producite, desde duo septimanas, un cambiamento, i.a. proque le actiones de Bush e le sues non plus pote esser explicate como un aberration temporari que non es supportate per un majoritate del populo american. Le necessitate de un determination de position sub iste nove circumstantias vale particularmente pro europeos. Nam un signal veniente del Statos membros del Union Europee ha un plus grande signification que signales de altere entitates. Le Union ipse representa economicamente un poter comparabile con le Statos Unite. Historica- e culturalmente Europa es plus strictemente ligate con America que qualcunque altere paises. Europa ha essite, in le secunde parte del vintesime seculo, le alliato politic le plus importante del Statos Unite. Punctos de vista de governamentos europee e intellectuales ha influentia in le Statos Unite, non super le governamento-Bush, ma super un numero de institutiones intellectual e politic de importantia; institutiones e personas asiatic, sudamerican e african ha un tal influentia in un mesura multo plus limitate. Lo que es importante in prime loco, es le conservation del ordine stabile del mundo construite in le secunde parte del vintesime seculo. Lo principal de iste ordine del mundo ha essite sempre le evitation e disapprobation de guerras, con le exception de guerras pro autoconservation. Il es del plus grande importantia que le resto del mundo audi que le nationes europee non supporta le principio de un guerra preventive. Si le Grande Britannia sub su actual prime ministro non es preste a acceptar un tal declaration de principio, le Europa continental debe ager sin London. ............................................................................ ............................................................................ ............................................................................ ............................................................................ ............................................................................ ............................................................................ ............................................................................ ............................................................................ ....................................... Car illo ES un mundo de phantasia in le qual vive le actual governamento amercican, un mundo in le qual anque le proprie poter es supervalutate de maniera disastrose. Le americanos es fascinate per le 400 milliardos de lor budget militar. Isto es anque le summa que, inter le euro-scepticos, es allegate como proba que un poter europee independente nunquam va esser un realitate. Ma poter non es un dato mesurabile, e non existe in forma solide.Illo es formate, super toto, per le maniera e le mesura in le qual le altere lo senti. Con 400 milliardos de dollars de bombas e missiles le militares american pote destruer multe cosas. Ma quanto plus es cambiate in ruinas, tanto plus dispare le previe poter. Tote le undo ha vidite que le militares american non pote plus progreder, in un pais que illes dice de haber liberate, que le continuation de morte e destruction. Pro iste ration le Statos Unite es, un facto multo triste, un poter declinante. Iste pais exhibe intrusivemente su debilitates. Le legitimitate de action american, que unquam existeva in le oculos del resto del mundo, ha disparite quasi totalmente. E justemente super iste reposava le poter american, juncte con le "baston detra le porta" pro governamentos con mal comportamento. Il se montra nunc que le "baston" es multo plus parve que on habeva credite. Un Europa que se distantia del idea de un guerra preventive, va acquirer immediatemente poter e influentia considerabile in le mundo. Un Europa que unanimemente se oppone al existente planos american pro le destruction del Nationes Unite como foro mundial de importantia politic - le sol que nos ha - pote crescer in influentia. Iste scopo non exige primarimente un integration politic ulterior e le formulation de un politica exterior commun. Illo age inversemente: un clar determination de position va influer multo favorabilemente le politica europee.