Jay, Io vide le metaphora de vostre apicula, volante de un flora a un altere, in alicun interlinguanos "visitante" un lista o gruppo de novas post un altere, discutente interlingua inter illes, monstrante como usabile e comprehensibile illo es. Kjell ha recrutate me a sci.lang, e frank pfaff :-) ha vidite mi notitias illac, e hodie nos ha iste servitor meraviliose, e nos ha discoperite Francisco con un talento immense pro interlingua, e alteres. Io ha observate como le esperantistas discute cosas inter illes a sci.lang, e io opina que un presentia de plure interlinguanos es plus persuasive que un sol individuo, proque un sol individuo es percipite como alicuno egregie, durante que un gruppo monstra que isto es un activitate social ben acceptate. [Io rememora un experimento del psychologo Stanley Milgram qui inviava studentes a in le stratas con marcas estranie super lor frontes a inquirer de estranieros le directiones a iste o ille loco. Quando le studentes vadeva solo, le estranieros tendeva tractar les como folle, possibilemente mal in le capite, e a vices non dava les le directiones desirate. Mais quando le studentes vadeva in gruppos con le mesme marcas super lor frontes, le estranieros esseva approchabile e mesmo inquireva amicabilemente in retorno le signification del marcas super lor frontes]. Il ha plure listas e gruppos a que on pote vader. Io cognosce sci.lang (un gruppo de novas), sci.lang.translation, talk.politics.european-union, soc.culture.europe--e il ha varie gruppos pro le varie paises e regiones como soc.culture.spain, soc.culture.catalan, soc.culture.french, ...italian, argentine, mexico, etc. Un possibile approche es pro plure interlinguanos a vader a un gruppo de novas e posta notitias pro le un le altere, discuter un thema, e attender al questiones. P. e. vos e io ha visitate LATIN-L, e nos ha generate alcun interesse justo per facer commentos super lo que altere individuos diceva que ha alicun connexion a interlingua (in nostre mentes). Es necesse initialmente a coordinar le actiones de un tal gruppo de interlinguanos. Qui vole facer lo? Quando? Ubi? Io debe cambiar le subjecto pro indicar que mi filio secunde, Roberto, 29, es iste septimana in Bogata, Columbia con un gruppo de gentes de su ecclesia, que ha volate illac pro laborar super le construction de un nove ecclesia de lor denomination in Bogata. Ille retorna iste proxime septimana. Es un nove experientia pro ille, habente non jammais essite in un altere pais. Inter tanto su sposa, su filia Mallory, e le can, le catto, e le conilio ha vadite a visitar su matre in Niceville, Florida presso a Destin. E a cambiar le subjecto mesmo plus, io non ha dicite alique super le bombas ecce hic in Atlanta--le un durante le jocos olympic, e duo altere, le secunde a un clinic pro abortiones in le nord de Atlanta, e un tertie a un caberet pro homosexuales. In le casos secunde e tertie post le prime bomba ha explodite, o un secunde explodeva se minus que le prime al mesme sito (facente injurias a certe policia e circumstantes), o le secunde bomba esseva discoperite per un cerca del sito, e illo esseva explodite sin accidente per le policia. Ben que il non ha un clar "signatura" in le fragmentos del bombas commun al tres, il ha alcun certe communalities inter illes in certe peculiar specie del metallo in le fragmentos commun al bombas. Mais le bomba al Parco Olympic esseva fabricate con pulvere, durante que iste ultime duo bombas esseva fabricate con le dynamite. Un suspicion es que le ultime duo bombas esseva designate pro attraher le policia e alora a exploder le secunde bomba inter illes, quando illes investiga le sito. Assi il non es clar qui es le ver objecto del bombas, le clinicas de abortion, le homosexuales, o le policia mesme. Isto es le novas de Atlanta. Stan Mulaik Io negligeva a dicer que le floras super le arbos arriva precocemente iste anno. Un corniolo [? dogwood tree, arbo cornaceae] in le fronte de mi casa jam monstra alcun floras aperite, e isto es quasi un mense precoce.